لالویادو کے71ویں یوم پیدائش کئی لیڈران نے مبارک باد دی
پٹنہ11جون (ایس او نیوز؍ آئی این ایس انڈیا ) آر جے ڈی سربراہ لالو پرساد یادو کے 71 ویں سالگرہ پر کانگریس صدر راہل گاندھی، بہار کے وزیر اعلی نتیش کمار، مغربی بنگال کی وزیر اعلی ممتا بنرجی کے علاوہ پارٹیوں کے کئی لیڈروں نے آج انہیں مبارک باد دی۔ بہار کے وزیر اعلی نتیش کمار نے ٹویٹ کیا کہ مسٹر لالو پرساد کو سالگرہ پر مبارک باد۔ ان کے جلد صحت مند ہونے کی تمنا کرتے ہیں ۔کانگریس صدر راہل گاندھی نے بھی ٹویٹ کر کہا کہ لالو پرساد جی کو سالگرہ کی بہت مبارکباد۔ میں نے ان کے بہتر صحت، کامیابی اور ہمیشہ خوش رہنے کے لئے دعا کرتا ہوں۔ مغربی بنگال کی وزیر اعلی ممتا بنرجی نے ٹویٹ کیا کہ سالگرہ مبارک ہو لالو جی! آپ ہمیشہ تندرست رہیں۔ اس کے علاوہ کانگریس لیڈر اشوک گہلوت، پرفل پٹیل، مرکزی وزیر اوپیندر کشواہا، جے ڈی یو کے سابق صدر شرد یادو سمیت کئی دیگر لیڈروں نے لالو کو ان کی سالگرہ پر مبارک باد دی ۔ لالویادو کے سخت مخالف نتیش کمار کی مبارکباد کے بارے میں پوچھے جانے پر لالو کی بیوی اور سابق وزیر اعلی رابڑی دیوی اور ان کے چھوٹے بیٹے تیجسوی پرساد یادو نے کہا کہ یہ اچھی بات ہے کہ نتیش جی نے بطور تکریم مبارک باد پیش کی ہے ۔کروڑوں روپے کے چارہ گھوٹالہ معاملے میں سزا یافتہ لالو کو جھارکھنڈ ہائی کورٹ نے 11 مئی کو علاج کے لیے چھ ہفتے کی عارضی ضمانت دی ہے۔پٹنہ میں واقع اپنی رہائش گاہ پر اپنے دونوں بیٹوں تیج پرتاپ یادو اور تیجسوی پرساد یادو کے ساتھ مل کر پارٹی کے سینکڑوں کارکنوں کی موجودگی میں لالو پرساد کی سالگرہ پر 71 پونڈ کا کیک کاٹا ،مگر لالو پرساد یاود وہاں موجو د نہیں تھے ۔ لالو کی سالگرہ کے موقع پر کل ان کی پارٹی کے یوتھ سیل نے آر جے ڈی کے ریاستی صدر دفتر میں خون کا عطیہ کیمپ کا انعقاد کیا گیا تھا۔