بنگلورو،27؍فروری(ایس او نیوز) ریاستی وزیر ٹرانسپورٹ رام لنگا ریڈی نے کہاکہ کے ایس آر ٹی سی کیلئے 3500اور بی ایم ٹی سی کیلئے 1560 نئی بسیں مارچ کے اختتام تک خریدی جائیں گی۔ جون کے اختتام تک نئی بسوں کی تعداد بڑھ کر ساڑھے پانچ ہزار سے متجاوز کرجائیں گی۔ انہوں نے کہاکہ پرانی بسوں کو سڑکوں سے ہٹاکر نئی بسیں دوڑانے کے منصوبے کے تحت یہ خریداری کی جارہی ہے ۔ اس منصوبے کے تحت آئندہ مارچ تک مزید تین ہزار بسیں خریدی جائیں گی۔ انہوں نے آج کے ایس آر ٹی سی ،ایس سی ایس ٹی ملازمین کی انجمن کے دفتر کا افتتاح کرتے ہوئے کہاکہ کے ایس آر ٹی سی یا بی ایم ٹی سی نے اپنے نفع اور نقصان پر توجہ دئے بغیر عوام کو بہتر سہولیات مہیا کرانے پر توجہ دی ہے۔ فی الوقت ریاست کے 41 شہروں میں سٹی بس سرویس دستیاب ہے۔ انہوں نے کہاکہ ہر سو بسوں میں سے 42 بسیں خسارہ میں چل رہی ہیں۔اس کے باوجود بھی عوام کے مفاد کو مدنظر رکھتے ہوئے تمام بسیں دوڑائی جاتی ہیں۔ انہوں نے کہاکہ ریاست بھر کی تمام 9؍ ہزار بسوں میں صرف 2250 بسیں منافع میں چل رہی ہیں،جبکہ 3600بسیں خسارہ میں چل رہی ہیں ، باقی بسوں سے ٹرانسپورٹ کمپنیوں کو کوئی نفع ہے اور نہ نقصان۔ وزیر موصوف نے بتایاکہ مرکزی حکومت کی طرف سے اچانک نوٹ بندی کے سبب ریاست کی ٹرانسپورٹ کمپنیوں کو 60 کروڑ روپیوں کا نقصان ہوا ہے۔ اس کے علاوہ وقتاً فوقتاً کاویری بند، مہادائی بند اور دیگر مسائل پر احتجاجوں کی وجہ سے بھی سرکاری بسوں کی آمدنی متاثر ہوئی ہے، اور ساتھ ہی احتجاجیوں کی طرف سے پہنچایا گیا نقصان الگ۔ اس کے علاوہ ملازمین کی تنخواہوں میں 12.5 فیصد اضافہ کیا گیا۔ ڈیزل کی قیمتیں بڑھیں، جس کی وجہ سے ٹرانسپورٹ کمپنیوں کے خسارہ میں اضافہ ہوگیا۔ اس موقع پر کے ایس آر ٹی سی ملازمین سے مخاطب ہوکر وزیر موصوف نے کہاکہ ڈپو منیجر اور دیگر اعلیٰ عہدیداران عوام کی امنگوں کے مطابق کام کریں۔محکمۂ ٹرانسپورٹ اور عوامی ٹرانسپورٹ کو عوام کی امنگوں کے مطابق اگر نہ چلایا گیا تو یہ ادارے خسارے میں ہی چلیں گے۔