نیترانی جزیزہ کے قریب بحیرۂ عرب میں کشتی ڈوب گئی۔ 2ماہی گیرلاپتہ ؛ گیارہ ماہی گیروں کو اُڈپی لے جانے میں کوسٹ گارڈ کامیاب
بھٹکل 30؍مئی (ایس او نیوز)کل منگل کو نیترانی جزیرہ کے قریب بحر عرب میں ایک ماہی گیری بوٹ ڈوبنے کی اطلاع موصول ہوئی تھی، اُس تعلق سے تازہ اطلاع یہ ہے کہ لاپتہ ہونے والے دو ماہی گیروں کا ابھی تک پتہ نہیں چل پایا ہے اور ہیلی کاپٹر کی مدد سے تلاشی مہم جاری ہے۔
خیال رہے کہ گہرے سمندر میں ماہی گیری کے بعد تملناڈو کی طر ف واپس لوٹنے والی اینجل ۔۱ اور اینجل ۔۲ نامی ماہی گیر کشتیاں بیچ سمندر میں طوفان کی زد میں آگئیں تھیں۔جس میں سے ایک کشتی تو پوری طرح سمندر میں غرق ہوگئی جبکہ دوسری کشتی کا انجن خراب ہونے کی وجہ سے سمندر میں پھنسی رہ گئی۔ ایک بوٹ ڈوب جانے سے چار ماہی گیر دوسری بوٹ تک پہنچنے میں کامیاب ہوگئے، البتہ دیگر دو ماہی گیر سمندر میں لاپتہ ہوگئے، جن کی تلاش جاری ہے۔
دراصل منگل کو واقعے کی اطلاع ملتے ہی مینگلور کوسٹ گارڈ کی دو بوٹ اور کاروار کوسٹ گارڈ کی ایک بوٹ سمندر کے بیچوں بیچ پھنسے ماہی گیروں کی مدد کے لئے روانہ ہوگئی تھی۔ مگر سمندر میں بہت ہی زیادہ طوفان ہونے کی وجہ سے وہ اس میں بروقت کامیاب نہیں ہوسکے۔مگربتایا گیا ہے کہ رات دیر گئے کوسٹ گارڈ 11 ماہی گیروں کو ملپے لے جانے میں کامیاب ہوگئے ہیں۔البتہ اینجل ۔۲ بوٹ پر ابھی بھی چار ماہی گیر بیچ سمندر میں اپنی جان ہتھیلی پر لے کر کشتی کا انجن ٹھیک کرنے میں لگے ہیں۔ بتایا گیا ہے کہ انجن کے پنکھے میں جالی پھنس جانے کی وجہ سے انجن نے کام کرنا بند کردیا ہے اور کوسٹ گارڈ کی مدد سے اب پھنسی ہوئی جالی کو نکالنے کا کاکام جاری ہے۔
سمندر میں لاپتہ ہونے والے ماہی گیروں کی شناخت پشپ راج (44سال) اور ارون راج (25سال) کے طور پر کی گئی ہے۔معلوم ہوا ہے کہ دونوں کشتیوں میں تمل ناڈو اور کیرالہ کے کل 13ماہی گیر موجود تھے۔یہ حادثہ بھٹکل لائٹ ہاؤس سے 25ناٹیکل میل دوری پر پیش آیا ہے۔