بھٹکل میں رات سے صبح تک مسلسل بارش؛ نیترانی جزیرہ کے قریب بوٹ اُلٹ گئی؛ چار ماہی گیروں کو بچالیا گیا؛ دو کی تلاش جاری
بھٹکل 29/مئی (ایس او نیوز) پیر رات دس بجے سے آج صبح سات بجے تک شہر بھٹکل میں بجلیوں کی چمک اور طوفانی ہوائوں کے ساتھ ہوئی مسلسل بارش کے بعد شہر کا موسم یکلخت تبدیل ہوگیا ہے اور لوگوں کو گرمی سے ایک حد تک راحت مل گئی ہے، مگر بارش سے کئی جگہوں پر درختوں کے گرنے سے نقصانات ہونے کی بھی اطلاعات موصول ہوئی ہیں۔
تازہ اطلاع قریبی جزیرہ نیترانی جزیرہ سے موصول ہوئی ہے، جہاں تمل ناڈو کی ایک بوٹ ڈوبنے سے دو ماہی گیروں کے لاپتہ ہونے کی خبر ہے۔ ذرائع نے بتایا کہ رات کو طوفانی ہوائوں کے ساتھ ہوئی بارش کے نتیجے میں ماہی گیری کی ایک بوٹ آج منگل صبح کی اولین ساعتوں میں نیترانی جزیرہ کے قریب اُلٹ گئی جس میں چھ ماہی گیر سوار تھے۔ بتایا گیا ہے کہ فوری طور پر مینگلور کوسٹ گارڈ کو واقعے کی جانکاری دی گئی تھی اور اب خبر موصول ہوئی ہے کہ کوسٹ گارڈ کے اہلکاروں نے موقع پر پہنچ کر چار ماہی گیروں کو بچالیا ہے ، البتہ دیگر دو ماہی گیروں کا پتہ نہیں چل پایا ہے، جن کی تلاش جاری ہے۔
کوسٹ گارڈ کی طرف سے ملی اطلاع کے مطابق انجل نامی ماہی گیربوٹ تمل ناڈو کی ہے، البتہ کوسٹل سیکوریٹی پولس کے ایک آفسر نے بتایا کہ یہ بوٹ کیرالہ کی ہے۔ مزید جانکاری موصول ہونی باقی ہے، جس کے بعد ہی صحیح صورتحال کا پتہ چلے گا۔
