مینگلور میں یکم جون سے جولائی کے اختتام تک سمندرمیں ماہی گیری پرپابندی
منگلورو24؍مئی (ایس او نیوز)ریاستی حکومت کی طرف سے جاری حکمنامہ کے مطابق مانسون کے دوران گہرے سمندروں میں ماہی گیری پر جو پابندی لاگو ہوتی ہے ، اس کا آغاز یکم جون سے ہوگااوریہ پابندی جولائی کے آخر تک برقرار رہے گی۔
سمندر میں ماہی گیری پر 61دنوں تک باقی رہنے والی اس پابندی کا اطلاق تمام مشینی ماہی گیرکشتیوں پر ہوگا۔ اس کے علاوہ10ہارس پاور سے زیادہ انجن والی تمام روایتی ماہی گیر کشتیوں پربھی یہ پابندی لاگو ہوگی۔مرکزی حکومت کے مویشی پالن، ڈیری اور فشریز کے محکمے نے بھی اسی عرصے میں ماہی گیری پر پابندی کا حکم جاری کیا ہے۔ اس طرح ریاستی اور مرکزی حکومت کی طرف سے ملک بھر میں یکساں پابندی رہے گی۔
ریاستی سرکار نے متعلقہ محکمہ جات کو ماہی گیری پر اس پابندی کو سختی کے ساتھ لاگو کرنے کی ہدایات جاری کی ہیں۔جو بھی ماہی گیر اس پابندی کی خلاف ورزی کریں گے ان کے خلاف قانونی کارروائی کی جائے گی اور ایسی کشتیوں کو ڈیزل کے لئے ملنے والی سبسیڈی ایک سال کے لئے روک دی جائے گی۔