بنگلورو۔16؍جنوری(ایس او نیوز) شہر میں ٹریفک کے دباؤ کو کم کرنے کے مقصد سے بنگلور میٹرو ریل پراجکٹ کے پہلے مرحلے کا کام اپریل میں پورا ہوجائے گا۔ 42کلومیٹر کی میٹرو خدمات عوام کیلئے کھول دی جائیں گی۔ یہ بات آج مرکزی وزیر برائے منصوبہ بندی واعداد ڈی وی سدانند گوڈا نے کہی۔ آج وکاس سودھا میں ان کے قلمدان کے تحت آنے والے میٹرو ریل پراجکٹ اور دیگر پراجکٹوں کااعلیٰ افسروں کے ساتھ جائزہ لینے کے بعد اخباری کانفرنس سے خطاب کرتے ہوئے مسٹر سدانند گوڈا نے کہا کہ میٹرو ریل کا پہلا مرحلہ 13845 کروڑ روپیوں کی لاگت پر مکمل ہورہا ہے۔اپریل میں عوام کیلئے میٹرو ریل کے اس حصہ کو مکمل طور پر کھول دیا جائے گا۔ جبکہ میٹرو ریل پراجکٹ کا دوسرا مرحلہ 72کلومیٹر پر مشتمل ہوگا۔ جس پر 26ہزار کروڑ روپیوں کا خرچ آئے گا۔ 2020 میں یہ پراجکٹ مکمل ہونے کی تاریخ طے کی گئی ہے، ہوسکتا ہے کہ اس سے پہلے ہی پورا ہوجائے۔ انہوں نے کہاکہ اس پراجکٹ کیلئے مرکزی اور ریاستی حکومتوں کی طرف سے فنڈز کی بروقت فراہمی کی جارہی ہے۔ انہوں نے کہاکہ میٹرو 2A پراجکٹ کے تحت سلک بورڈ سے کرشنا راجپورم تک کی 18کلومیٹر لائن کی تعمیر کیلئے 4200 کروڑ روپے درکار ہیں۔ اس رقم کو یکجا کرنے کیلئے افسران نے نیا طریقۂ کار اپنانے کا فیصلہ کیا ہے۔ساتھ ہی ریاستی اور مرکزی حکومت سے مدد طلب کی گئی ہے۔سدانند گوڈا نے بتایاکہ میٹرو ریل پراجکٹ کے تیسرے مرحلے کے طور پر ناگوار سے دیونہلی کے کیمپے گوڈا انٹرنیشنل ایرپورٹ تک کی لائن 30کلومیٹر پر مشتمل تیار کی جائے گی۔ انہوں نے کہاکہ 2020 میں بنگلور انٹرنیشنل ایرپورٹ میں سالانہ آنے جانے والے مسافروں کی تعداد بڑھ کر پانچ کروڑ تک ہوجائے گی۔جس کی وجہ سے یہ پراجکٹ ضروری سمجھا جارہا ہے اس پراجکٹ کی شروعات کے ساتھ ہی اسے جلد ا ز جلد پورا کیا جائے گا۔ بنگلور میٹرو ریل کارپوریشن نے اس سلسلے میں ایک جامع پراجکٹ تیار کرکے مرکز کی منظوری کیلئے پیش کیا ہے۔ انہوں نے کہاکہ تینوں مرحلوں کے میٹرو ریل پراجکٹوں کی تکمیل کے بعد بنگلور میں 244کلومیٹر کی مسافت کیلئے میٹرو خدمات دستیاب رہیں گی۔ وزیر موصوف نے کہاکہ ریاست میں ان کی وزارت کے تحت 44 پراجکٹ ریاست بھر میں چل رہے ہیں۔ 150 سے زائد کروڑ روپیوں کی لاگت کے ہر منصوبے پر 93829 کروڑ روپیوں کا مجموعی فنڈ صرف کیا جارہاہے۔ ان میں سے سات منصوبے قبل از وقت پورے ہوچکے ہیں جبکہ 18منصوبوں پر کام جارہی ہے۔ باقی منصوبے اراضی اکوائر کرنے اور دیگر وجوہات کے سبب ابھی شروع ہونہیں پائے ہیں۔انہوں نے کہاکہ 14 قومی شاہراہوں میں سے دس قومی شاہراہوں پر کام پورا ہوچکا ہے۔ اس موقع پر بنگلور سب اربن ریل پراجکٹ شروع کرنے کیلئے مرکزی اور ریاستی حکومت کے درمیان معاہدہ پر دستخط ہوئے۔ اس پراجکٹ کی تیاری سے قبل ایک تفصیلی رپورٹ وضع کی جائے گی، مرکزی اور ریاستی حکومتوں کے اشتراک سے یہ پراجکٹ شروع کیا جائے گا۔اس موقع پر ریاستی وزراء کے جے جارج ، آر وی دیش پانڈے اور دیگر اعلیٰ افسران موجود تھے۔