ہبلی 27/مارچ (ایس او نیوز)  اے ٹی ایم مشین میں رقم ڈلوانے والی ایک وین میں اچانک آگ لگ گئی جس سے وین کے اندر رکھی گئی  73 لاکھ کی رقم  کھٹائی میں پڑ گئی، مگر  وین کے سیکوریٹی گارڈس  کسی طرح پوری رقم کو باہر نکالنے میں کامیاب ہوگئے۔ یہ واقعہ ہبلی کے قریب ورور نامی مقام پر آج منگل کو  پیش آیا۔

ذرائع کے مطابق  رقم کینرا بینک کی تھی، جبکہ وین CFK  ایجنسی کی تھی، اس وین کے ذریعے کینرا بینک کے اے ٹی ایم مشین میں رقم جمع کرانے 73 لاکھ روپے کی خطیر رقم دی گئی تھی، بتایا گیا ہے کہ ہیرور نامی مقام پر اچانک انجن کی طرف سے آگ کے شعلے بلند ہونے لگے اور دیکھتے ہی دیکھتے آگ تیزی کے ساتھ پھیلنی شروع ہوگئی۔

سیکوریٹی گارڈس اور ڈرائیور نے رقم کی حفاظت کرتے ہوئے فوراً وین سے باہر نکل گئے اور اپنی بھی جان بچائی۔ کچھ ہی دیر میں پوری وین آگ کے شعلوں میں لپٹ  گئی اور پوری طرح خاکستر ہوگئی۔

ہبلی مضافاتی پولس تھانہ میں معاملہ درج کیا گیا ہے اور پولس چھان بین کررہی ہے۔