بنگلورو،23؍فروری(ایس او نیوز) ریاستی وزیر ٹرانسپورٹ رام لنگا ریڈی نے کہاکہ تمام سرکاری اور نجی بسوں میں آگ بجھانے والے آلات رکھنا لازمی قرار دیا گیا ہے۔ اخباری نمائندوں سے با ت چیت کرتے ہوئے انہوں نے کہاکہ گزشتہ روز نلمنگلا میں کے ایس آر ٹی سی بس کے شعلہ پوش ہوجانے اور اس میں ایک خاتون کی موت کے واقعہ کو محکمہ نے کافی سختی سے لیا ہے اور طے کیا ہے کہ آئندہ کسی بھی بس میں اس طرح کے حادثہ کی صورت حال سے نمٹنے کیلئے ہر بس میں آگ بجھانے کے آلات کی تنصیب لازمی قرار دی جائے۔نہ صرف بسیں بلکہ مال بردار لاریوں کو بھی آگ بجھانے والے آلات نصب کرنا لازمی قرار دیتے ہوئے ہدایت جاری کی جاچکی ہے۔ انہوں نے کہاکہ کل نلمنگلا میں بس کے جل جانے کے سبب جو جانی اور مالی نقصان ہوا ہے آئندہ اس طرح کی صورتحال پیدا نہ ہونے پائے اس کیلئے یہ قدم اٹھایا گیا ہے۔ انہوں نے کہاکہ کے ایس آر ٹی سی اور دیگر نجی ٹرانسپورٹرس کی ریاست بھر میں 24ہزار بسیں دوڑتی ہیں ، ان تمام میں آگ بجھانے والے آلات کی تنصیب مکمل طور پر لازمی قرار دیا گیا ہے۔ انہوں نے کہاکہ اس سے پہلے ریاستی حکومت کی ہدایت پر تمام سرکاری اور نجی بسوں میں ہنگامی طور پر نکلنے کیلئے الگ سے دروازے کی تعمیر کروائی گئی تھی۔آئندہ اگر آگ حادثات سے بچنا ہوتو ہر بس اور مال بردار گاڑیوں میں آگ بجھانے کے آلے کا ہونا لازمی قرار دیا جائے گا۔ انہوں نے کہاکہ شہر بنگلور میں ٹریفک کے اژدہام کے سبب مسافروں کو ایک سرکاری بس میں سوار ہونا بھی مشکل ہوتا جارہا ہے۔ان حالات میں ٹریفک کے انفرااسٹرکچر کو اور بھی بہتر بنانے کیلئے ضروری تیاری کی جاچکی ہے۔ انہوں نے کہاکہ مارچ کے اختتام تک ریاست بھر میں 1650 نئی بسیں شامل رہیں گی۔ان میں سے150 وولوو بسیں ہوں گی۔ ان تمام بسوں میں آگ بجھانے والے آلات پہلے ہی سے نصب کئے جائیں گے۔ نئی بسوں کی شمولیت کے بعد پرانی بسوں کو مرحلہ وار خدمات سے ہٹالیا جائے گا۔وزیر موصوف نے بتایاکہ بسوں میں آتش کش آلات لگانے کیلئے پرائیویٹ آپریٹروں کو حکومت کی طرف سے سہولت مہیا کی جائے گی۔ 24ہزار سرکاری بسوں میں ان آلات کی تنصیب کیلئے عنقریب ٹنڈر طلب کئے جائیں گے، اس کیلئے تمام سرکاری افسران کو ہدایت دی جاچکی ہے۔