بنگلور میں ائرو انڈیا شو کے دوران پارکنگ احاطہ میں اچانک آگ؛ قابو پانے تک سوسے زائد سواریاں جل کر خاکستر
بنگلور23/فروری (ایس او نیوز)ائیرو انڈیا شوکے چوتھے دن بنگلور کے یلہنکا ائرفورس اسٹیشن کے پارکنگ والی جگہ پر اچانک آگ لگنے سے 150 سے زائد سواریاں شعلہ پوش ہونے کی اطلاع موصول ہوئی ہے۔ آگ لگنے کی یہ واردات آج سنیچر صبح پیش آئی۔
ذرائع سے ملی اطلاع کے مطابق دس سے زائد فائر بریگیڈ کی گاڑیوں کےذریعے آگ پر قابو پالیا گیا ہے اور کسی جانی نقصان کی کوئی اطلاع نہیں ملی ہے۔ بتایا گیا ہے کہ قریب سو کار آگ میں جل کر خاکستر ہوگئی ہیں۔ فائر اینڈ ایمرجنسی سروس کے ڈائرکٹر جنرل آف پولس ایم این ریڈی نے میڈیا والوں کو بتایا کہ آگ پر اب قابو پالیا گیا ہے۔
آگ لگنے سے کتنا نقصان ہوا ہے اور آگ کیسے بھڑکی تھی، اس تعلق سے ابھی مصدقہ خبر موصول نہیں ہوئی ہے، البتہ کہا جارہا ہے کہ سوکھی گھاس پر آگ لگی تھی جو تیز ہوا میں پھیلتی چلی گئی اور کاروں کو اپنی لپیٹ میں لے لیا۔ شبہ ظاہر کیا جارہا ہے کہ غالباً کسی نے جلتے سگریٹ کا تکڑا سوکھی گھاس پر پھینکا ہوگا، جس سے آگ بھڑک گئی ہوگی۔
آگ لگنے کی واردات کے بعد ائیرشو کو عارضی طور پر روک دیا گیا ہے، البتہ دوپہر دو بجے شو دوبارہ شروع کئے جانے کی بات کہی گئی ہے۔
آگ کے شعلے بلند ہوتے ہی شو دیکھنے کے لئے آئے عوام میں خوف وہراس کی لہر دو ڑ گئی تھی، کئی لوگ یہ دیکھنے کے لئے پارکنگ احاطے کی طرف بھاگنے لگے کہ کہیں اُن کی کار بھی آگ کی زد میں نہ آگئی ہو۔
خیال رہے کہ ائیرو انڈیا 2019 شو سنیچر اور اتوار کو عام لوگوں کے لئے اوپن رکھا گیا ہے۔