کنہیا کمار کے خلاف پٹنہ ایمس انتظامیہ نے درج کرایا ایف آئی آر
پٹنہ ،15؍ اکتوبر (ایس او نیوز؍آئی این ایس انڈیا ) جواہر لال نہرو یونیورسٹی (جے این یو) طلباء یونین کے سابق صدر کنہیا کمار کی مشکلیں ’بڑھ‘ سکتی ہیں۔ پٹنہ ایمس انتظامیہ نے کنہیا کمار کے خلاف ایف آئی آر درج کرا یا ہے ۔ کنہیا کے علاوہ سنیل کمار اور 80 سے 100 نامعلوم افراد کے خلاف جونیئر ڈاکٹرس سے جھگڑا کرنے کے باعث پھلواری شریف پولیس اسٹیشن میں ایف آئی آر درج کرایا گیا ہے ۔
وہیں دوسری طرف ڈاکٹرس کے ہڑتال پر جانے کی وجہ سے مریضوں کو مشکلات کا سامنا کرنا پڑ رہا ہے۔ واضح ہو کہ پٹنہ واقع آل انڈیا انسٹیٹیوٹ کے ڈاکٹروں کا الزام ہے کہ کنہیا اتوار کی رات ایمس میں داخل اپنے ایک دوست اور اے آئی ایس ایف لیڈر سشیل کمار سے ملنے یہاں پہنچے تھے۔ کنہیا کے ساتھ قریب 40۔50 حامیوں نے ان کے ساتھ ٹراما ایمرجنسی میں جانے کی کوشش کی۔ کنہیا کے حامیوں کو جب سیکورٹی گارڈ نے روکنے کی کوشش کی تو گارڈز کے ساتھ مبینہ طور پر مارپیٹ کی گئی۔ وارڈ میں تعینات ڈاکٹروں نے جب ان کے حامیوں کو واپس جانے کو کہا تب بھی حامی واپس نہیں گئے اور انہوں نے ڈاکٹروں سے ہاتھا پائی کی ۔ ایمس میں کافی دیر تک لے کر ہنگامہ ہوتا رہا۔پٹنہ ایمس کے صدر ڈاکٹر ونے کمار نے بتایا کہ اس واقعہ کے بعد تمام ڈاکٹروں نے کام بند کر دیا ہے۔ انہوں نے کہا کہ ایمس انتظامیہ سے مل کر ملزمان کے خلاف مقامی تھانے میں ایف آئی آر درج کرنے اور ڈاکٹروں کی حفاظت کے مطالبات کو لے کر تمام ڈاکٹر ہڑتال پر چلے گئے ہیں۔