سال 2018سے ہو سکتی ہے مالی سال میں تبدیلی، نومبر میں پیش ہو سکتا ہے عام بجٹ
نئی دہلی،27؍جون(ایس او نیوز؍آئی این ایس انڈیا)سال 2018سے ملک میں مالی سال کے آغاز اپریل کے بجائے جنوری سے ہو سکتا ہے۔حکومت اس کی تیاری میں لگی ہے۔اس کے ساتھ ہی ملک میں 150سال سے چلی آ رہی اپریل ۔مارچ کی مالی سال کی روایت میں تبدیلی ہو سکتی ہے، اگر ایسا ہوتا ہے تو مرکز کا اگلا بجٹ اس سال نومبر میں پیش ہو سکتا ہے۔ذرائع کے مطابق حکومت مالی سال کے لیے کیلنڈر سال کے مطابق تبدیل کرنے پر کام کر رہی ہے۔وزیر اعظم نریندر مودی نے اس تبدیلی کی وکالت کی ہے،یہ ایک اور تاریخی تبدیلی ہوگی۔حکومت اس سے پہلے بجٹ کو فروری مہینے کی آخری تاریخ کو پیش کرنے کی دہائیوں پرانی روایت کو تبدیل کر چکی ہے۔اس سال بجٹ یکم فروری کو پیش کیا گیا۔ایسے میں مالی سال کو تبدیل کرنے کی جس پیشکش پر تبادلہ خیال کیا جا رہا ہے اس کے مطابق پارلیمنٹ کا بجٹ اجلاس دسمبر سے کافی پہلے ہو سکتا ہے تاکہ بجٹ عمل کو سال کے اختتام سے پہلے مکمل کیا جا سکے۔
ذرائع نے کہا کہ بجٹ عمل کو مکمل کرنے میں دو ماہ کا وقت لگتا ہے۔ایسے میں بجٹ سیشن کی ممکنہ تاریخ نومبر کے پہلے ہفتے ہو سکتی ہے۔ہندوستان میں مالی سال یکم اپریل سے 31مارچ تک ہوتا ہے۔اس نظام کو 1867میں منظور کر لیا گیا جس سے ہندوستانی مالی سال کا برطانوی حکومت کے مالی سال سے تال میل کیا جا سکے۔اس سے پہلے تک ہندوستان میں مالی سال کی شرات یکم مئی کو شروع ہوکر 30اپریل تک ہوتی تھی۔وزیر اعظم مودی کے مالی سال کا کیلنڈر سال سے ملنے کی خواہش جتانے کے بعد حکومت نے گزشتہ سال ایک اعلی سطحی کمیٹی تشکیل دی۔