مینگلور 30/مئی (ایس او نیوز) ساحلی کرناٹکا میں طوفانی ہوائوں کے ساتھ زور دار بارش کے نتیجے میں چار لوگوں کی موت واقع ہونے کے بعد اب پانچویں موت ہونے کی اطلاع موصول ہوئی ہے۔البتہ یہ موت بارش کی وجہ سے نہیں، مگر موت پانی میں گرنے سے ہی ہوئی ہے۔
ذرائع سے ملی اطلاع کے مطابق کنڑا فلم ڈائرکٹر سنتوش شٹی مینگلور کے قریب بیلتنگڈی کے اُجیرے میں واقع ایک واٹر فالس کی فوٹو شوٹنگ لے رہے تھے کہ اچانک ان کا پیر پھسل گیا اور وہ سیدھے فالس میں جاگرے اور وہیں ڈوب کر ہلاک ہوگئے۔بتایا گیا ہے سنتوش شٹی کا تعلق مینگلور کے قریب کٹیل سے ہے۔
بتایا گیا ہے کہ کنڑا فلم 'Kanasu - Kannu Teredaga' کے ڈائرکٹر سنتوش شٹی اپنے تین ساتھیوں کے ساتھ بدھ کو ائیرمیل نامی واٹر فالس پر نئی کنڑا فلم 'گنددا کوڑی' کے لئے اپنے جسم میں روبوٹ کا گیٹ آپ باندھ کر ڈران کیمرہ کے ذریعے فوٹو شوٹ کررہے تھے کہ اچانک ان کا پیر پھسل گیا اور وہ سیدھے فالس میں جاگرے، بتایا گیا ہے کہ چونکہ ان کے جسم میں بھاری بھرکم روبوٹ کا گیٹ آپ فکس تھا، جس کی وجہ سے اُنہیں پانی سے باہر نکلنے کا موقع ہی نہیں مل سکا اور کیمرہ کے ان اوزاروں نے انہیں فالس میں گرنے کے بعد غالباً ہاتھ پیر مارنے کا بھی موقع نہیں دیا۔ بتایا گیا ہے کہ ان کے جسم پر کیمرا کے جو اوزار بندھے ہوئے تھے اُس کا وزن قریب 35 کلو تھا۔
ذرائع کے مطا بق گذشتہ دو دنوں سے جاری بارش کی وجہ سے واٹر فالس میں پانی بھی کافی زیادہ تھا ۔
حادثے کی اطلاع ملتے ہی پولس ٹیم اور فائر بریگیڈکا عملہ جائے وقوع پر پہنچا اور واٹر فالس میں تلاشی مہم شروع کرتے ہوئے ان کی لاش کو باہر نکالا۔
خیال رہے کہ پیر کی شام سے بدھ شام تک مینگلور اور اُڈپی میں بادلوں کی گرج اور خطرناک بجلی کے ساتھ موسلادھار بارش کا سلسلہ جاری ہے، بارش نے پورے ساحلی علاقوں میں عام زندگی مفلوج کرکے رکھ دی ہے، بالخصوص مینگلور میں زوردار بارش کے نتیجے میں 29مئی تک نقصانات کا تخمینہ 16.62 کروڑ روپیوں کا لگایا جاچکا ہے، جس کےبعد بھی کافی نقصانات ہوئے ہیں، جس کا حساب لگایا جارہا ہے۔ آج بدھ کو ویسے بارش میں کافی کمی دیکھی گئی ہے اور اکثر علاقوں میں جمع شدہ بارش کا پانی بھی اُترچکا ہے، البتہ نشیبی علاقوں میں پانی برابر بھرا ہوا دیکھا گیا ہے۔