فکرو خبراب نوائطی زبان میں بھی دستیاب؛ بھٹکل جماعت المسلمین قاضی کی دعا کے ساتھ ہوا خوبصورت اجراء
بھٹکل 11ڈسمبر (ایس او نیوز) کرناٹک کا ساحلی شہر بھٹکل اپنی نوعیت کے اعتبار سے ایک امتیازی شان رکھتا ہے اسکا اندازہ اس بات سے لگایا جاسکتا ہے کہ یہاں کے علماء کرام مختلف میدانوں میں اپنی نوعیت سے دعوتی سرگرمیاں انجام دے رہے ہیں۔ اُردو، انگریزی اور کنڑا نیوز پورٹل کے بعد اب فکر و خبر نے پیر کی شب نوائطی زبان میں نئے پورٹل کا اجرا کیا، اس موقع پر جماعت المسلمین بھٹکل کے قاضی مولانا مُلا محمد اقبال ندوی اور بنگلور سے تشریف فرما مولانا شاکر اللہ صاحب رشادی سمیت عمائدین شہر شریک تھے۔
تقریب سے خطاب کرتے ہوئے مولانا شاکر اللہ رشادی نے کہا کہ جولوگ یہ کہتے ہیں کہ ملا کی ڈور مسجد تک ہے وہ سب سے بڑا جھوٹ کہتے ہیں، ایسا کہنے والواں کو کم از کم بھٹکل کے علماء کی طرف ضرور دیکھنا چاہیے کہ یہاں کے علماء کرام کس طریقے سے مختلف میدانوں میں اپنی دعوتی خدمات انجام دے رہے ہیں۔ مولانا نے کہا کہ میڈیا میں سب سے زیادہ جھوٹ بولا جاتا ہے، ایسے میں ہم علماء کو اور دیندار طبقہ کو اس میدان میں آگے آنے کی ضرورت ہے۔مزید کہا کہ میڈیا جس طرح جھوٹ بول بول کرانسانیت کو تباہ کررہاہے ، اس کو ہر کوئی جانتا ہے۔ مولانا نے مزید فرمایا کہ آج کل میڈیا تو میڈیا ممبر ومحراب سے بھی حق کو چھپایا جا رہا ہے، انہوں نے کہا کہ کتنے ایسے ائمہ ہیں جو مقتدیوں کے چہرے دیکھ کر اپنا موضوع خطاب بدل دیتے ہیں۔انہوں نے سوال کیا کہ جب ممبر ومحراب پر حق کے گلے کو گھونٹا جائے گا تو بھلا کونسی ایسی جگہ ہوگی جہاں سود کی حرمت وغیرہ پر بات کی جاسکے۔
فکر و خبر کے روح رواں مولوی ہاشم ندوی نے فکر و خبر کی کارکردگی رپورٹ پیش کرتے ہوئے مرحوم مولانا عبدالباری کی کمی کا احساس دلایا جن کی رہنمائی اور رہبری میں فکر وخبر کا کام شروع کیا گیا تھا۔انہوں نے کہا کہ اب فکر و خبر چار زبانوں میں آپ کے سامنے خبریں اور حالات حاضرہ سے واقف کراےگا جبکہ بہت جلد ندوۃ العلماء لکھنؤ میں حضرت مولانا رابع حسنی ندوی کے دست مبارک سے ہندی اخبار کا بھی رسم اجرا عمل میں آئے گا۔ مولوی ہاشم ندوی نے اسکے بعد عربی زبان میں بھی فکر و خبر شروع کرنے کا اعلان کیا۔ انہوں نے کہا کہ فکر و خبر صرف ایک ویب سایٹ نہیں بلکہ یہ دعوت کا بہت بڑا مشن ہے۔انہوں نے کہا کہ ہم صرف خبریں نہیں دیتے بلکہ ساتھ میں فکر بھی دیتے ہیں۔اھل سنہ ویب سائٹ کے نام سے پانچ سال پہلے ہم نے کتابوں کی لایبریری بھی شروع کی ہے، جس میں تقریبا ساڑھے پانچ ہزار کتابیں موجود ہیں جس کو آپ ڈاونلوڈ کر سکتے ہیں۔ انہوں نے اس بات کی بھی جانکاری دی کہ فکر و خبر کے تحت ہفتہ واری تفسیر کا درس بھی شروع کیا گیا ہے۔
فکر و خبر کے صدر مولانا الیاس جاکٹی ندوی نے اپنے خطاب میں مولوی ھاشم صاحب کی بات کو آگے بڑھاتے ہوئے کہا کہ ہمارا مشن ہے کہ ہم ہندوستان کی ہر زبان میں خبریں پیش کریں۔ قاضی خلیفہ جماعت المسلمین بھٹکل مولانا خواجہ معین الدین اکرمی مدنی ، جامعہ اسلامیہ بھٹکل کے مہتمم مولانا مقبول کوبٹے ندوی اور فکر و خبر کے ٹرسٹی جناب محتشم جان عبدالرحمن نے بھی اپنے تاثرات پیش کرتے ہوئے فکر و خبر کی ٹیم کو دلی مبارکباد پیش کی اور نیک خواہشات کا اظہار کیا۔
جلسہ کی نظامت مولوی عبد النور فکردے ندوی، مولوی شریح ندوی اور مولوی احمد ایاد ندوی کررہے تھے۔ جلسہ مولوی رضوان کندنگوڑہ کی تلاوت سے شروع ہوا جبکہ رضوان ابن افضل نے بارگاہ رسالت میں گلہائے عقیدت پیش کیا۔ اجمل التلاوہ جو رمضان المبارک کی مناسبت سے شروع کیا گیا تھا اسمیں اور آن لائن نعتیہ مسابقہ جو ماہ ربیع الاول کی مناسبت سے شروع کیا گیا تھا دونوں میں امتیازی نمبرات حاصل کرنے والوں کو انعامات سے اور سندوں سے نوازا گیا۔اس موقع پر تمام امتیازی نمبرات حاصل کرنے والوں نے اپنا نعتیہ مظاہرہ بھی پیش کیا ۔ کل 152 مساہمین نے شرکت کی جن کے لئے عمر کی کوئی قید نہیں تھی۔ بتایا گیا ہے کہ 65 سال تک کی عمر کے لوگوں نے بھی نعتیہ مقابلہ میں حصہ لیا تھا، جس کی مولانا اظہر ندوی نے مکمل رپورٹ پیش کی۔ نایب قاضی جماعت المسلمین بھٹکل مولانا عبد الرب ندوی کی دعا پر جلسہ اختتام کو پہنچا۔