این اے حارث کو کابینہ میں شامل کرنے کا مطالبہ
بنگلورو،31؍مئی (ایس او نیوز) بنگلورو کے شانتی نگر اسمبلی حلقہ سے مسلسل تین مرتبہ منتخب ہونے والے کانگریس کے رکن اسمبلی این اے حارث کو کانگریس، جے ڈی ایس مخلوط حکومت کی قیادت کررہے کمار سوامی کی کابینہ میں شامل کرنے شہر کی ایک سماجی تنظیم سٹی زن آف کرناٹک اور دیگر تنظیموں نے مطالبہ کیاہے ۔
کل یہاں بنگلورو پریس کلب میں منعقدہ ایک اخباری کانفرنس سے خطاب کرتے ہوئے ان سماجی تنظیموں کے کلیم اللہ شاہ، ایس ایم اقبال، مفتی عبدالغفار قاسمی ، مفتی سید عطا اللہ ندوی ، عیسائی اور دلت تنظیموں کے عہدیداروں نے کہا کہ شانتی نگر حلقہ سے آج تک کسی رکن اسمبلی کو ریاستی کابینہ میں جگہ نہیں دی گئی ہے جبکہ دیگر حلقوں سے منتخب اراکین اسمبلی کو کابینی وزیر بننے کا موقع دیا گیا ہے ۔ شانتی نگر حلقہ سے ایک بھی لیڈر ایک سے زیادہ مرتبہ منتخب نہیں ہوا ہے جبکہ این اے حارث مسلسل تین مرتبہ منتخب ہوکرایک ریکارڈ بنایا ہے ۔ حارث میں وہ تمام خوبیاں ہیں جو ایک وزیر کے لئے ضروری ہیں ۔ اس لئے مسٹر حارث کو ایک مرتبہ کابینہ میں شامل کرنے کا اس وفد نے پُرزور مطالبہ کیا ہے۔ یہ وفد متعلقہ کانگریس لیڈروں کو بھی اس ضمن میں ایک عرضداشت پیش کرے گا ۔