لائیوٹی وی پر سماج وادی پارٹی کے ترجمان سے لڑنے کے بعد بی جے پی میں ہی گھرگئے گوروبھاٹیہ
نئی دہلی،9دسمبر(آئی این ایس انڈیا/ایس او نیوز) ایک نیوز چینل میں بحث کے دوران سماج وادی پارٹی (SP)کے ترجمان انوراگ بھدوریا کے ساتھ ہاتھاپائی کے بعد بھارتیہ جنتا پارٹی (BJP)کے قومی ترجمان گورو بھاٹیہ اپنی ہی پارٹی کے اندر گھر گئے ہیں۔اس مسئلے پر بی جے پی لیڈر آئی پی سنگھ نے بھاٹیہ کوکٹہرے میں کھڑاکیاہے۔انہوں نے انتخابات سے پہلے بھاٹیہ پر بی جے پی کو نقصان پہنچانے کابھی الزام لگایا۔انہوں نے ٹویٹ کیا کہ سنوگورو بھاٹیہ، یہ بی جے پی ہے،تمہارے اندر اب بھی ایس پی کا وائرس باقی ہے، تم سماجووادی پارٹی کی ثقافت لارہے ہو، ویڈیو میں تمہاری جارحیت نظرآرہی ہے اور تم نے ایک پینلسٹ کے طور پرپارٹی کا وقار گرایا ہے۔اس کے نتیجے میں ایس پی کو کم اور بی جے پی کو زیادہ نقصان پہنچے گا،تم انتخابات کے مہینے میں بی جے پی کو نقصان پہنچارہے ہو۔
آپ کو بتا دیں کہ گزشتہ سال ہی گورو بھاٹیہ نے سماجوادی پارٹی کو چھوڑ کر بی جے پی کا دامن تھاما تھا۔اس کے علاوہ سماج وادی پارٹی کی لیڈرجوہی سنگھ نے بھی گورو بھاٹیا پر جارحانہ ہونے کاالزام لگایا۔جواب میں انہوں نے کہا کہ لائیو ٹی وی کے مباحثے کے دوران بی جے پی کے ترجمان کا رویہ انتہائی قابل مذمت تھا،وہ پہلے بھی کئی بارجارحانہ بنے ہیں،اب ہم گوروبھاٹیہ کابائیکاٹ کریں گے۔
آپ کو بتا دیں کہ نوئیڈا کے سیکٹر 16Aمیں واقع ایک نیوز چینل میں بحث کے دوران بی جے پی اور سماج وادی پارٹی کے ترجمان آپس میں لڑ پڑے تھے۔اس کے بعد بی جے پی کے ترجمان نے سیکٹر 20پولیس ا سٹیشن سے شکایت کی جس کے بعد پولیس نے ایس پی لیڈرکو حراست میں لے لیا۔
