نئے سال کی آمد پر دہلی میں جم کر ہوئی آتش بازی، عدالت کے حکم کی ہوئی خلاف ورزی
نئی دہلی ،یکم جنوری (ایس او نیوز؍آئی این ایس انڈیا) نئے سال کی آمد پر جشن کے دوران دہلی این سی آر میں جم کر آتش بازی ہوئی۔آلودگی کی سنگین مسئلہ کا سامنا کر رہی قومی دارالحکومت میں کئی جگہ لوگ سپریم کورٹ کی طرف سے مقررہ وقت سے پہلے اور بعد میں بھی آتش بازی کرتے ہوئے نظر آئے۔
مرکزی حکومت کی طرف سے جاری ہوا کا معیاراور پیشگوئی نظام نے پیر کو آگاہ کیا تھا کہ کھلے میں الاؤ جلانے یا آتش بازی کی وجہ سے، ہوا میں آلودگی اور زیادہ ہو جائے گی جس سے ہوا کے معیار میں تیزی سے کمی آ سکتی ہے۔یہاں تک کہ آلودگی انتہائی سنگین زمرے میں بھی پہنچ سکتی ہے۔آتش بازی کو لے کر دیے گئے سپریم کورٹ کے حکم کی تعمیل کو یقینی بنانے کے لئے کرسمس اور نئے سال کی شام سے پہلے مرکزی آلودگی کنٹرول بورڈ (سی پی سی بی) نے قومی راجدھانی دہلی، نوئیڈا اور گروگرام کے ریاستی افسران اور دہلی پولیس کو خط لکھا تھا۔لیکن انتباہ کے باوجود کئی مقامات پر عدالت کے حکم کی خلاف ورزی ہوئی۔
سپریم کورٹ نے کرسمس اور نئے سال کے موقع پر جشن کو لے کر حکم دیا تھا کہ نئے سال کا جشن نصف شب سے شروع ہوتا ہے لہٰذا رات 11 بج کر 55 منٹ سے لے کر 12 بج کر 30 منٹ تک صرف سبز پٹاکھے پھوڑنے کی اجازت ہوگی۔ اکتوبر سے دہلی میں آلودگی کی سطح تشویشناک بنی ہوئی ہے۔ گزشتہ دس دن سے تو قومی دارالحکومت میں فضاکا معیار مسلسل نقصان دہ ثابت ہوا ہے۔