بھٹکل میں ہزاروں عقیدتمندوں نے منایا تیر ھبّا؛ پورے جوش اور جذبے کے ساتھ کھینچا گیارتھ
بھٹکل 25/مارچ (ایس او نیوز) ہر سال کی طرح امسال بھی ہندوئوں کے نئے سال کے موقع پر یوگادی کے اگلے روز رام نوامی کا رتھ کھینچنے والا تہوار بڑی دھوم دھام کے ساتھ منایا گیا جس میں ہزاروں عقیدتمندوں نے شرکت کرتے ہوئے تیر حبّا سے لطف اُٹھایا۔
چن پٹن شری ہنومنت بھگوان کا رتھ اُتسوا ہمیشہ کی طرح اس بار بھی چن پٹن ہنومنت مندر سے نکلا، اس رتھ کو کھینچنے کے لئے نوجوان کثیر تعداد میں موجود تھے، جنہوں نے پوری طاقت کے ساتھ رتھ کو کھینچتے ہوئے پھول بازار سے مین روڈ پر لایا، پھر وہاں سے الحجاز دکان کے سامنے کار اسٹریٹ پر گھوم کر واپس چن پٹن ہنومنت مندر میں لے جایا گیا۔جہاں پہنچ کر تیر حبّا اختتام کو پہنچا۔
ہمیشہ کی طرح اس بار بھی رتھ کھینچنے سے پہلے دوپہر قریب تین بجے مندر انتظامیہ کا ایک وفد سلطان اسٹریٹ میں واقع شاہ بندری چرکن کے مکان پر پھل اور مٹھائیاں لے کر پہنچا اور اُنہیں بھی اس تہوار میں شریک ہونے کی دعوت دی۔ اس موقع پر مندر انتظامیہ کے صدر شری دھر موگیر، جنرل سکریٹری بابنّا سمیت کافی ذمہ داران موجود تھے۔ بعد میں مندر میں پوجا پاٹ کے بعد ٹھیک 5:40 منٹ پر مندر کے باہر سے رتھ کو کھینچ کر لے جانے کا عمل شروع ہوا۔
رتھ کو کھینچنے کے دوران نظارہ دیکھنے بھٹکل مین روڈ پر مسلمانوں کی بھی کافی بھیڑ جمع تھی، کافی لوگ چھتوں پر کھڑے ہوکر نظارہ دیکھ رہے تھے جبکہ کار اسٹریٹ اور ماری کٹہ میں دونوں کمیونٹی کے لوگ کثیر تعداد میں جمع تھی۔
تہوار کو دیکھتے ہوئے پولس کی طرف سے بھی سخت حفاظتی انتظامات کئے گئے تھے اور ضلع کے ایس پی ونائک پاٹل خود بھٹکل میں موجود رہ کر حالات پر نگاہ رکھی تھی۔ پورے امن و امان کے ساتھ تہوار شام کو اختتام کو پہنچا۔
بھٹکل رکن اسمبلی منکال وئیدیا سمیت سابق رکن اسمبلی جے ڈی نائک، دیگر لیڈران وغیرہ موجود تھے۔
