انکولہ میں باپ اور اُس کے دونوں بیٹے غرقاب
انکولہ 9/ اپریل (ایس او نیوز) انکولہ تعلقہ کے ہٹّی کیری گرام پنچایت کی ایک ندی میں تیرنے کے دوران ایک ہی خاندان کے تین افراد ڈوب کر ہلاک ہوگئے۔ موصولہ رپورٹ کے مطابق مہلوکین کے نام رمیش امبیگا (50سال) ان کے فرزندان روی (18سال) اورنوین (15سال) بتائے گئے ہیں۔
غوطہ خوروں کی مدد سے نوین اور روی کی لاش اتوار شام کو ہی برآمد کی گئی، البتہ رمیش کی تلاش جاری تھی، مگر آج پیر صبح رمیش کی لاش بھی برآمد کئے جانے کی اطلاع ملی ہے۔
ذرائع سے ملی اطلاع کے مطابق باپ اپنے دو بیٹوں کو ساتھ لے کر ایک چھوٹی کشتی کے ذریعے ندی میں مچھلیوں کا شکار کرنے کے لئے گیا تھا، بتایا گیا ہے کہ دونوں لڑکے تیرنے میں زیادہ ماہر نہیں تھے، سمجھا جارہا ہے کہ غالباً کوئی لڑکا ندی میںگر گیا ہوگا، جس کو بچانے کی کوشش میں بقیہ دونوں بھی ندی میں ڈوب گئے۔
بتایا گیا ہے کہ صبح دس بجے یہ لوگ گھر سے مچھلیوں کے شکار کے لئے نکلے تھے، شام تک جب یہ لوگ گھر نہیں لوٹے تو گھروالوں نے گھبرا کر پاس پڑوس کے لوگوں کی مدد سے اُنہیں ندی میں تلاش کرنا شروع کردیا۔ قریب پانچ گھنٹے کی مسلسل مشقت کے بعد ندی سے پہلے نوین کی لاش برآمد ہوئی، بعد میں دیگر دونوں لاشوں کا پتہ لگایا گیا۔
پولیس نے غیر فطری موت کا معاملہ درج کرلیا ہے۔
