بی جے پی پر نکتہ چینی کرنا دانشوروں کا فیشن بن چکا ہے: شٹر
بنگلورو، 12؍ستمبر (ایس او نیوز؍عبدالحلیم منصور) سابق وزیر اعلیٰ اور اپوزیشن لیڈر جگدیش شٹر نے کہا ہے کہ ملک کے کچھ نام نہاد دانشور آر ایس ایس اور بی جے پی کو نشانہ بنانا فیشن بناچکے ہیں۔ آج گوری لنکیش کے قتل کی مذمت کیلئے منعقدہ جلسۂ عام میں اس قتل کیلئے فرقہ پرست تنظیموں کو ذمہ دار قرار دئے جانے پر ردعمل ظاہر کرتے ہوئے انہوں نے کہاکہ قاتل کون ہے، اس کا ابھی سراغ نہیں ملا ہے، ایم ایم کلبرگی کا قتل ہوئے دو سال کا عرصہ گزر چکا ، ان کے قاتلوں کا بھی یہ حکومت پتہ نہیں چلا سکی۔ حکومت کی اس ناکامی کے خلاف احتجاج ہونا چاہئے تھا، لیکن احتجاج میں شریک لوگ مرکزی حکومت پر نکتہ چینی کررہے ہیں۔ سابق وزیر آر اشوک نے گوری لنکیش کی قتل کی مذمت کیلئے منعقدہ جلسۂ عام کو کانگریس کا جلسہ قرار دیا اور کہاکہ اس جلسے میں صرف کانگریس کارکن ہی شریک رہے۔ سابق وزیر سی ٹی روی نے کہاکہ گوری لنکیش کے قتل کیلئے آر ایس ایس اور بی جے پی کو جو لیڈران ذمہ دار ٹھہرارہے ہیں انہیں سچائی سامنے آنے کے بعد برقعہ پہن کر گھومنا پڑے گا۔