ریاست کے کسانوں کو اب موسمی حالات ایس ایم ایس کے ذریعہ معلوم ہوں گے
بنگلورو،31؍مئی(ایس او نیوز) ریاست کے کسانوں کو اب موسمی حالات ' امکانی بارش سے متعلق معلومات ایس ایم ایس کے ذریعہ حاصل ہوں گے ۔ اس سے کسانوں کو کافی مدد بارش کے موسم میں ملے گی اور وہ بارش کے دوران اپنے کھیتوں سے متعلق منصوبے بناسکتے ہیں۔ریاستی حکومت کی بیشتر زرعی اسکیمات کے تحت اندراج کروانے والے کسان بھی اس کے استفادہ کنندگان بن سکتے ہیں۔ ارتھ سسٹم سائنس آگنائزیشن کے گرامین کرشی موسم سیوا کے حصہ کے طور پر اس کی شروعات کی جائے گی۔ اس اسکیم پر عمل ریاستی زرعی یونیورسٹیز ' انڈین کونسل آف اگریکلچرل ریسرچ ' آئی آئی ٹیز کے اشتراک سے کیا جائے گا۔ ذرائع کے مطابق اس اسکیم کے استفادہ کنندگان کی سب سے زیادہ تعداد کرناٹک میں ہے ۔ یہ ایس ایم ایس مقامی زبان میں بھیجا جائے گا تاکہ مختلف طریقوں سے کسانوں کے لئے یہ مددگار بن سکے ۔ضلعی سطح کے محکمہ موسمیات کی معلومات پیشگی طور پر 5دن پہلے فراہم کی جائے گی۔ اس میں بارش سے متعلق معلومات بھی ہوں گی۔ گذشتہ سال مختلف مرکزی ایجنسیوں کے اشتراک سے اس پراجکٹ کا آغاز کیا گیا تھا۔ ایک ہی پلیٹ فارم پر بڑی تعداد میں کسانوں کو لانا ایک بڑا مشکل کام ہے ۔