راجکوٹ12جون (ایس او نیوز؍ آئی این ایس انڈیا ) گجرات کے وزیر اعلی وجے روپانی نے الزام لگایا ہے کہ ریاست میں چل رہی کسان تحریک اپوزیشن کا سیاسی ا سٹنٹ ہے اور کسانوں سے اپیل کی کہ گمراہ نہ ہوں۔ انہوں نے کہا کہ ریاستی حکومت ہمیشہ کسانوں کا خیال رکھتی ہے، ان کے مسائل پر توجہ دیتی ہے اور ان کے مسائل کو حل کرنے کی مسلسل کوشش کرتی ہے۔ روپانی کل رات یہاں ایک نیوز چینل کی جانب سے منعقد پروگرام میں بول رہے تھے۔ مرکز اور گجرات کی حکومت کسانوں کے مسائل کو حل کرنے کے لئے تیار ہے۔ اس لئے اس بار ریاستی حکومت نے کم از کم امدادی قیمت پر پانچ کروڑ روپے کے زرعی مصنوعات کی خریداری کی ہے۔ روپانی نے کسی سیاسی پارٹی کا نام لئے بغیر کہا کہ گجرات میں کسانوں کا مظاہرہ اپوزیشن کا سیاسی اسٹنٹ ہے اور یہ صرف اس لیے ہو رہا ہے کہ اگلے سال لوک سبھا انتخابات ہونے والے ہیں۔انہوں نے کہا کہ اپوزیشن کسانوں کے مسائل کو تبھی یاد کرتا ہے جب انتخابات قریب ہوتے ہیں لیکن گجرات کے کسان اپوزیشن جماعتوں سے گمراہ نہیں ہوں گے۔ کانگریس نے کل ریاستی مظاہرے کیے تھے جس دوران کسانوں نے سڑکوں پر زرعی پیداوار اور دودھ بہائے تھے ۔