کسانوں کو بجلی کی فراہمی کیلئے آٹھ ہزار کروڑ روپیوں کی سبسیڈی جاری:شیوکمار
بنگلورو،22؍اکتوبر(ایس او نیوز) ریاستی حکومت کی طرف سے کسانوں کو جو بجلی فراہم کی جارہی ہے اس کیلئے اب تک 8ہزار کروڑ روپیوں کی سبسیڈی ادا کی گئی ہے۔وزیر توانائی ڈی کے شیوکمار نے آج یہ بات بتائی۔انہوں نے کہاکہ حکومت کی طرف سے جتنی بجلی زراعت کیلئے دی جارہی ہے اس میں سے 39 فیصد مفت فراہم ہورہی ہے۔ انہوں نے کہاکہ حکومت کی طرف سے ہونے والی بجلی کی ترسیل کے غلط استعمال کی شکایات کا جائزہ لیا جارہاہے۔اس غلط استعمال کو روک کر بجلی کی پیداوار میں اضافہ اور ترسیل میں رساؤ کوکم کرنے کیلئے قدم اٹھائے جارہے ہیں۔ وزیر توانائی نے کہاکہ مرکزی حکومت کی مدد لے کر کسانوں کو بجلی مہیا کرانے کیلئے قدم اٹھائے جارہے ہیں۔ جہاں بھی دشواری ہو تین دن کے اندر اسے نمٹانے کی ہدایت دی گئی ہے۔ محکمۂ توانائی میں 24ہزار ملازمین کے تقرر کا اعلان کرتے ہوئے ڈی کے شیوکمار نے بتایاکہ پہلے مرحلے میں لائن مینوں ، انجینئرس سمیت 14؍ ہزار ملازمین کی راست بھرتی کی جائے گی۔ دوسرے مرحلے میں گیارہ ہزار ملازمین کا تقرر کیا جائے گا۔ ریاست بھر میں 898بجلی کے ترقیاتی کام 10334 کروڑ روپیوں کی لاگت پر جاری ہیں۔ اس میں سے 2016کروڑ روپے حکومت کی طرف سے فراہم کئے جاچکے ہیں۔جلد از جلد ان کاموں کو مکمل کرلیا جائے گا۔