ڈپازٹ رکھنے والے کسانوں کے قرضے بھی معاف ہوں گے: بینڈپا قاسم پور
بنگلورو،24؍ستمبر(ایس او نیوز) ریاستی وزیر برائے کوآپریشن بینڈپا قاسم پور نے کہا ہے کہ کوآپریٹیو بینکوں میں رقم ڈپازٹ رکھنے والے کسانوں کے قرضے بھی معاف کرنے کے لئے ایک ترمیمی حکمنامہ جلد جاری کیا جائے گا ۔
اخباری نمائندوں سے بات چیت کرتے ہوئے انہوں نے کہاکہ بعض بینکوں کی طرف سے ڈپازٹ رکھنے والے کسانوں کے قرضے معاف کرنے میں تذبذب کو دیکھتے ہوئے ریاستی حکومت نے طے کیا ہے کہ بینکوں میں کسانوں کا جتنا چاہے ڈپازٹ ہو اس کی پروا کئے بغیر ان کے قرضے معاف کئے جا ئیں۔ انہوں نے کہاکہ اس سے پہلے بینکوں نے یہ موقف اپنایا تھا کہ جن کاشتکاروں نے بینکوں میں رقم بطور ڈپازٹ جمع کی ہے وہ قرضے کی معافی کے دائرے میں نہیں آسکتے۔ ڈپازٹ کی رقم کو قرضے کی قسطوں میں شامل کرنے کی بھی پہل کی گئی تھی۔
تاہم ریاستی حکومت نے اب طے کیا ہے کہ کسانوں کی طرف سے جو رقم بینکوں میں ڈپازٹ کی گئی ہے اسے متاثر کئے بغیر کسانوں کے قرضے معاف کئے جائیں۔ وزیر موصوف نے کہاکہ نظر ثانی شدہ حکمنامہ فوراً جاری کردیا جائے گا۔ وزیر موصوف نے بتایاکہ جولائی 2019 تک کوآپریٹیو بینکوں کے تمام قرضوں کی ادائیگی کے لئے حکومت کی طرف سے ضروری قدم اٹھائے جائیں گے۔ انہوں نے بتایاکہ ریاست کے 22 لاکھ کسانوں کے قرضے معاف کئے گئے ہیں مزید دو یا تین ہزار کسانوں کے قرضوں کی معافی باقی رہ گئی ہے اسے جلد ہی پورا کرلیا جائے گا۔
وزیر موصوف نے بتایاکہ اگلے 9؍ ماہ کے دوران حکومت کسانوں کے قرضوں کی معافی کے عوض بینکوں کو 9448کروڑ روپے اداکرے گی۔ انہوں نے کہاکہ سابقہ سدرامیا حکومت نے کسانوں کے جو قرضے معاف کئے وہ 2000 کروڑ روپیوں کی رقم بھی بینکوں کو ادا کردی گئی ہے۔ منڈیا میں ایک مقروض کسان کی خود کشی کے متعلق افسوس کا اظہار کرتے ہوئے وزیر موصوف نے کہاکہ حکومت کسانوں کے ساتھ ہے، ان کی جو بھی پر یشانی ہے اسے سلجھانے کی دیانتدارانہ کوشش کی جائے گی۔اسی لئے کسان خود کشی جیسے انتہائی قدم سے باز آجائیں۔