اتر پردیش میں ایک کسان کی خودکشی
مظفر نگر ،13؍اکتوبر ( ایس او نیوز؍آئی این ایس انڈیا)یوگی سرکار جہاں ایک طرف کسان کی ترقی اور اس کے فلاح کا ڈھنڈورا پیٹ رہی ہے وہی یہ دردناک اطلاع بھی مل رہی ہے کہ مظفر نگر ضلع میں ایک 55 سالہ کسان نے مبینہ طور پر شاملی ضلع میں ٹرین کے سامنے خود کشی کر کے اپنی جان گنوادی ۔ پولیس نے آج اس کی اطلاع دی ۔ تھانہ انچارج سمے سنگھ نے کہا کہ شمن سنگھ کی لاش راشد گھر گاؤں میں ریلوے ٹریک کے نزدیک ملی ۔سرکاری افسر نے کہا کہ مقتول کے اہل خانہ کا کہنا ہے کہ کچھ دنوں سے وہ خاندانی تنازعات کی الجھنوں میں مبتلا تھے ۔ لیکن ابھی تک آزاد ذرائع سے مقتول کے خودکشی کرنے کی وجہ دریافت نہیں ہوسکی ہے، گمان کیا جاتا ہے مقتول شمن سنگھ مالی قرض کی وجہ سے ساہوکاروں کے جبری تقاضوں کے شکار تھے اور اس سے نالاں ہوکر انتہائی قدم اٹھانے پر مجبور ہوگئے ۔ لاش کو پولیس اپنے قبضہ میں لیکر پوسٹ مارٹم کیلئے ضلع اسپتال بھیج چکی ہے ۔