ناسک میں قرض میں ڈوبے کسان نے خودکشی کی
ناسک / مالیگاؤں، 16؍دسمبر (ایس او نیوز؍آئی این ایس انڈیا) مہاراشٹر کے ناسک ضلع میں ایک کسان نے چار لاکھ روپے کے قرض کی وجہ سے خود کشی کر لی۔مقامی حکام نے دعوی کیا کہ موجودہ سال میں اس علاقے میں خود کشی کرنے والے کسانوں کی تعداد 108 تک پہنچ گئی ہے۔تحصیلدار جیوتی دیورے نے بتایا کہ28سالہ ننلیش دھرم راج نے ضلع کے مالیگاؤں علاقے میں موجے۔وزیر کھیڑے گاؤں میں پھانسی لگا لی ۔اس پر چار لاکھ روپے کا قرض بقایا تھا۔وڈنیر۔خاکردی پولیس نے کسان کی موت کے سلسلے میں ایک مقدمہ درج کیا ہے اور وہ واقعہ کی وجوہات کا پتہ لگا رہی ہے۔پولیس نے بتایا کہ 12 دسمبر کو یہاں نندگاؤں تحصیل میں 40 سالہ کسان نے مبینہ طور پر خود کشی کر لی تھی اور اس کے پاس سے برآمد ایک نوٹ میں یہ لکھا ہوا تھا کہ اس نے ایک بینک اور کریڈٹ سوسائٹی سے قرض لیا تھا۔ ناسک ضلع مجسٹریٹ دفتر کے ذرائع نے بتایا کہ ضلع میں 2018 میں 108 کسان خود کشی کر چکے ہیں۔ان میں سے 15 کسانوں نے نومبر میں اور نولوگوں نے دسمبر میں خود کشی کی۔حکام نے بتایا کہ ان کسانوں کے لواحقین سے کی گئی تفتیش میں پتہ چلا کہ قرض، اس مانسون میں بارش کم ہونا اور فصل برباد ہونا ان خودکشی کی وجوہات ہیں۔