قرضوں کی معافی کے نام پر کسانوں کے ساتھ دھوکہ، وزیراعلیٰ کمار سوامی پر یڈیورپاکا الزام
بنگلورو،6؍اکتوبر(ایس او نیوز) سابق وزیر اعلیٰ اور ریاستی بی جے پی صدر بی ایس یڈیورپا نے کہاہے کہ وزیراعلیٰ ایچ ڈی کمارسوامی نے قرضوں کی معافی کے نام پر ریاست کے کسانوں کے ساتھ دھوکہ کیا ہے۔
اخباری نمائندوں سے بات چیت کرتے ہوئے انہوں نے کہاکہ کسانوں کے قرضوں کی معافی کا عمل صرف سستی شہرت کے لئے کیاگیا ہے۔ درحقیقت مقروض کسانوں کی طرف سے خود کشی کا سلسلہ رکنے کا نام نہیں لے رہا ہے ، قومی بینکوں سے قرضوں کی معافی کے نام پر ریاستی حکومت کسانوں سے کھلواڑ کررہی ہے، قرضوں کی ادائیگی کے لئے تمام بینکوں سے کسانوں کو ہراساں کرنے کا سلسلہ اب بھی جاری ہے۔
ان بینکوں کو ریاستی حکومت کی طرف سے کوئی ہدایت نہیں دی گئی ہے کہ کسانوں کو نوٹس جاری کرنے کا سلسلہ بند کیا جائے۔ انہوں نے کہاکہ قرضے وصول کرنے قومی بینکوں کی طرف سے کسانوں کو مسلسل نوٹس جاری کرکے انہیں متنبہ کیا جارہا ہے کہ وہ اپنے قرضے ادا کریں یا کارروائی کا سامنا کریں۔
وزیراعلیٰ کمار سوامی کو چاہئے کہ فوری طور پر اس سلسلے میں قومی بینکوں سے بات چیت کریں اگر اس میں وہ ناکام ہیں تو اعتراف کریں کہ کسانوں کے قرضوں کی معافی محض ایک سیاسی ناٹک تھی۔
انہوں نے کہاکہ ریاستی کابینہ میں توسیع اور ردوبدل کے بہانے سے ریاست کے تمام ترقیاتی کام روک دئے گئے ہیں۔ مخلوط حکومت میں شامل دونوں پارٹیوں کے درمیان تال میل برائے نام بھی نہیں ہے۔
عوام کی طرف سے حکومت کو جو ٹیکس کی رقم ادا کی جاتی ہے اس کا استعمال غیر ذمہ دارانہ طریقے سے کیاجارہاہے۔ ریاست کا انتظامیہ مکمل طور پر مفلوج ہوگیا ہے، اور عوام یہ سوال کرنے پر مجبور ہوگئے ہیں کہ ریاست میں حکومت ہے بھی یا نہیں۔