دہلی ATM سے نقلی نوٹ برآمد;پی ایم صحیح نوٹوں کی پرنٹنگ نہیں کروا سکتے، ملک کیسے چلائیں گے؟ کجرایوال کا سوال
نئی دہلی22فروری(ایس او نیوز/آئی این ایس انڈیا)دہلی کے سنگم وہار علاقے میں واقع اسٹیٹ بینک آف انڈیاکے ایک اے ٹی ایم سے2 ہزار روپے کے نقلی نوٹ نکلنے کامعاملہ سامنے آیاہے۔جسکے بعدحکومت کے سار ے دعووں کی پول بھی کھل گئی ہے اورکئی اہم سوالات بھی سامنے آئے ہیں۔بنیادی سوال یہ ہے کہ کیااس میں بینک اہلکاروں کی بھی ملی بھگت ہے۔کالے دھن اورجعلی نوٹ ختم کرنے کے لیے ہی نوٹ بندی کی گئی تھی لیکن اب اس کی بھی ہوانکل گئی۔بیرون ملک نوٹ چھپنے کی بات کہی جارہی تھی لیکن اس نئے نوٹ میں جعل سازی اگربینک اہلکاروں کی ملی بھگت ہوتوسب دعوے فرضی ہی ہوں گے۔
روہت کمارنامی ایک شخص نے6 فروری کو اس اے ٹی ایم سے8 ہزار روپے نکالنے پہنچے تو ان کے ہاتھ2-2 ہزار روپے کے 4 نوٹ آئے، لیکن ان نوٹوں کو دیکھنے پر وہ حیران رہ گئے۔فرضی نوٹ پر سرکاری نشان کی جگہ ایک چھوٹے باکس میں ’چورن لیبل‘ لکھاہواہے جبکہ ریزرو بینک آف انڈیا کی جگہ انٹرٹینمنٹ بینک آف انڈیادرج ہے۔ ساتھ ہی اس میں ہولڈر کو 2000 روپے کی جگہ 2000 'کوپن کی بات لکھی ہوئی ہے۔مرکزی حکومت کی جگہ بچوں کی حکومت(چلڈرینس گورنمنٹ) کا حوالہ دیتے ہوئے نوٹ پر آر بی آئی کی مہر کی جگہ'PK' درج ہے۔اے ٹی ایم کے سکیورٹی گارڈ نے بتایا کہ روہت کمار پہلے تونوٹوں کو نہارتے رہے پھر انہوں نے پولیس کو اطلاع دی۔ گارڈنے فوری طور پر اپنے سینئر کو اطلاع دی اور انہیں بتایا کہ اے ٹی ایم میں نقلی نوٹ ہیں۔ اس کے بعد فوری طور پر اے ٹی ایم کو بند کر دیا گیا۔یہ اے ٹی ایم تب سے لے کر اب تک آؤٹ آف سروس ہے. جب ایک پولیس اہلکارمعاملے کی تحقیقات کرنے پہنچا تو اسے بھی ایک فرضی نوٹ ملا۔ اس معاملے میں دھوکہ دہی کا کیس درج کیاگیاہے۔اے ٹی ایم میں جس شخص نے آخری بار پیسے ڈالے تھے، اس کی شناخت سی سی ٹی وی سے ہوگئی ہے۔ ایک افسرنے بتایا کہ اس ایک واقعہ کے علاوہ کسی دوسرے نے شکایت درج نہیں کرائی ہے۔ شاید کچھ ہی نوٹ بدلے گئے تھے۔ہمیں یہ معلوم ہے کہ کس وقت حقیقی نوٹوں کی جگہ ان جعلی نوٹوں کوبدلاگیا۔ اس واقعہ کو لے کر دہلی کے وزیراعلیٰ اروندکیجریوال نے بدھ کو وزیر اعظم نریندر مودی کی تنقیدکی۔ انہوں نے ٹویٹ کیاکہ جب ایک وزیر اعظم درست طریقے سے نوٹوں کی پرنٹنگ نہیں کروا سکتا، تو پھر وہ ملک کیسے چلا سکتا ہے؟ انہوں نے کہا کہ مودی نے پورے ملک کو مذاق کاکردار بنا کر رکھ دیاہے۔