نئی دہلی19 مئی (ایس او نیوز؍ آئی این ایس انڈیا) کرناٹک میں یدی یورپا کے وزیر اعلی کے عہدے سے استعفیٰ دینے اور حکومت گرنے کے بعد راہل گاندھی نے بی جے پی اور پی ایم مودی پر جم کر حملہ کیا۔ ساتھ ہی کرناٹک میں بی جے پی کی شکست کو جمہوریت کی جیت بتایا۔ راہل نے کہا کہ بی جے پی کے ممبران اسمبلی اور اسپیکر نے قومی گیت کی توہین کی ہے ۔ کرناٹک کی جیت یہ بتاتی ہے کہ بھارت میں پیسہ اور طاقت ہی سب کچھ نہیں ہے۔ قومی گیت سے پہلے اجلاس سے اٹھ کر چلے جانا یہ ان کی عزت کوواضح کرتا ہے ۔ راہل نے کہا کہ مجھے فخر ہے کہ اپوزیشن ایک ساتھ کھڑا رہا اور بی جے پی کو شکست دے دی اور ہم ایسا کرنا جاری رکھیں گے۔ راہل نے کہا کہ کیا آپ نے محسوس کیا کہ کرناٹک اسمبلی میں بی جے پی کے ممبران اسمبلی اور اسپیکر نے قومی ترانہ سے پہلے ایوان چھوڑ کر چل دیئے؟ یہ ظاہر کرتا ہے کہ اگر اقتدار میں ہیں تو وہ کسی بھی ادارے کی توہین کر سکتے ہیں۔ بی جے پی اور آر ایس ایس دونوں میں توہین کرنے والے ادارے اور افراد ہیں۔راہل نے کہا کہ بی جے پی نے حکومت بنانے کے لئے اور راج کرنے کے لئے جے ڈی ایس اور کانگریس کے ممبران اسمبلی کو خریدنے کی کوشش کی۔ راہل نے کہا کہ اس ملک نے پی ایم مودی اور امت شاہ کو دکھایا ہے کہ یہ ملک پیسوں اور پاور سے بڑا ہے۔ راہل نے کہا کہ یہی وہ چیز ہے، جس کے خلاف ہم لڑ رہے ہیں۔راہل نے کہا کہ کرناٹک کے عوام، کانگریس کے کارکن اور جے ڈی ایس کے کارکنان کا شکریہ ادا کرتا ہوں، جنہوں نے اس جنگ میں ساتھ دیا اور ڈٹے رہے۔ ساتھ ہی راہل نے پی ایم مودی کے پیغام دیتے ہوئے کہا کہ وزارت عظمیٰ سے بڑا ملک ہے۔ انہوں نے کہا کہ پی ایم ملک اور سپریم کورٹ سے بڑا نہیں ہے۔ انہوں نے کہا کہ بی جے پی یہ مانتی ہے کہ ملک کے ہر ادارے کو برباد کیا جا سکتا ہے۔ پی ایم مودی کی قیادت جمہوری نہیں ہے۔ انہوں نے کہا کہ پی ایم مودی کی قیادت آمریت کی ایک خونچکاں تصویر ہے ، ایسے دستور کو صبح بے نور کومیں نہیں مانتا ۔