بھج،  23جنوری (ایس او نیوز؍ یو این آئی) گجرات کے ضلع کچھ میں مرکزی اشیا اور خدمات ٹیکس (جی ایس ٹی) کمشنریٹ نے پانچ سو کروڑ روپے سے زائد کے فرضی جی ایس ٹی بل گھپلہ کا انکشاف کرتے ہوئے اس کے ماسٹر مائنڈ گرو کمل سنگھ کو آج گاندھی دھام میں گرفتارکرلیا۔اسے گاندھی دھام میں چیف جیوڈیشیل مجسٹریٹ کی عدالت میں پیش کیا گیا جس نے اسے پانچ فروری تک عدالتی حراست میں بھیج دیا۔سی جی ایس ٹی کے کچھ کمشنریٹ کے گاندھی دھام میں واقع دفتر کے ایک افسر نے بتایا کہ 38سالہ گروکمل نے ایک جی ایس ٹی فارم اپنے نام سے اور 17دیگر لوگوں کے نام سے رجسٹرڈ کرائے تھے ۔ وہ یہ تمام کھاتے خود ہی چلاتا تھا۔ اس نے 531کروڑ کے فرضی جی ایس ٹی بل بنائے تھے جبکہ کسی طرح کے مال کی سپلائی ہوئی ہی نہیں تھی۔ ان کے ذریعہ 97.69کروڑ روپے کا انپٹ ٹیکس کریڈٹ گھپلہ کیا گیا تھا۔اس معاملہ کی تفصیلی جانچ کی جارہی ہے ۔