انکولہ میں بینک سے نکالے گئے نوٹوں کے بنڈل میں نقلی نوٹ !
انکولہ 4؍اگست (ایس او نیوز)اسٹیٹ بینک سے نکالے گئے دس ہزار روپیوں کے بنڈل میں مبینہ طور پر ایک سو روپے کا نقلی نوٹ برآمد ہوا ہے۔ کہا جاتا ہے کہ عبدالقادر مجاور نامی ایک شخص نے گوکرن اسٹیٹ بینک سے دس ہزار روپے نکالے اور وہ رقم سنڈیکیٹ بینک میں جمع کرنے کے لئے لے جائی گئی تو وہاں پر موجود نوٹ گننے والی مشین نے اس بنڈل میں ایک سو روپے کا ایک نوٹ نقلی ہونے کی تصدیق کی۔
عبدالقادر مجاور کے مطابق انہوں نے جب وہ نقلی نوٹ واپس لاکر اسٹیٹ بینک والوں سے ا س کو بدلنے کی درخواست کی تو بینک والوں نے پلّہ جھاڑ لیااور اس سے اپنا کوئی تعلق نہ ہونے کی بات کہہ کر انہیں واپس لوٹادیا۔اس طرح اپنی ناکردہ غلطی کے لئے عبدالقادر کو سو روپے کا نقصان خواہ مخواہ ہی برداشت کرنا پڑا ہے۔