بنگلورو:22/مارچ(ایس اؤ نیوز)وزیر صحت رمیش کمار نے بتایاکہ ریاست کے تمام کسانوں اور زرعی مزدوروں کو یشسوینی منصوبے کے تحت طبی سہولیات فراہم کرنے پر غور کیا جارہاہے۔ کونسل میں بجٹ پر مباحث کے دوران اپوزیشن لیڈر کے ایس ایشورپا نے بتایاکہ یشسوینی جیسے کامیاب منصوبے کو محکمہئ کوآپریشن سے محکمہئ صحت کو منتقل کرنا درست نہیں ہے۔جس پر وزیر موصوف نے بتایا کہ صرف چھ فیصد کسان کوآپریٹیو اداروں کے ممبر ہیں، جبکہ کوآپریٹیو اداروں میں ممبر شپ حاصل نہ کرنے والے کسانوں اور مزدوروں کو بھی طبی سہولت فراہم کرنا حکومت کا مقصد ہے۔ فی الحال یشسوینی منصوبے کے تحت مریض کو دو لاکھ روپیوں تک کی طبی خدمات فراہم ہورہی ہے، جبکہ اس میں اضافہ کے علاوہ علاج کیلئے درکار تمام رقم حکومت کے ذریعہ فراہم کرنے کا منصوبہ تیار کیاگیا ہے۔ انہوں نے بتایاکہ اس خصوص میں وہ دونوں ایوانوں کے اراکین سے مشورہ کریں گے۔ اس موقع پر انہوں نے بتایاکہ ریاست کے تمام تعلقہ جات میں وینٹی لیٹر اور آئی سی یو قائم کرنے کے علاوہ 200 جنرک میڈیکلس اور تمام اضلاع میں بلڈ پلیٹ لیٹس مراکز قائم کرنے کا منصوبہ ہے۔