اشون بولے،روی بھائی کے ڈریسنگ روم میں ہونے سے بہتر ہوتا ہے ماحول،50ویں ٹیسٹ میچ کو یادگار بنانے کے ارادے سے میدان پر اتریں گے اشون
کولمبو ،25؍جولائی(ایس او نیوز؍آئی این ایس انڈیا)ہندوستانی ٹیم کے ا سٹار آف اسپنر روی چندرن اشون نے کہا ہے کہ ٹیم انڈیا ابھی کمبلے-کوہلی تنازعہ کو پیچھے چھوڑ آگے بڑھ چکی ہے،ساتھ ہی اشون نے روی شاستری کی تعریف کرتے ہوئے کہا کہ ڈریسنگ روم میں موجودہ کوچ شاندار انسان ہیں۔اشون کے مطابق روی شاستری ٹیم میں مثبت ماحول بناتے ہیں۔انہوں نے کہا کہ جب روی بھائی پچھلی بار ٹیم کے ساتھ یہاں تھے تو ہم گال ٹیسٹ میں ہار گئے تھے اور انہوں نے ہمیں ہمارے کیریئر کے اس مایوس کن وقت سے باہر نکالا تھا۔
اشون نے مزید کہا کہ وہ ایسے شخص ہیں جن سے ڈریسنگ روم میں مثبت اثر پڑے گا،ہم ایک ساتھ کام کرنے کی طرف بڑھ رہے ہیں اور کچھ شاندار نتائج حاصل کر رہے ہیں۔ساتھ ہی اشون نے کمبلے-کوہلی تنازع پر کہاکہ ہم نے اس لمحے کو پار کر لیا ہے،فیصلہ لیا جا چکا ہے،یہ یقینی طور پر ایسی بات ہے جس پر میں کوئی تبصرہ نہیں کر سکتا۔
سری لنکا کے خلاف پہلے ٹیسٹ پر اشون نے کہا کہ گال میں ان کی کارکردگی ہمیشہ اچھی رہی ہے اور اس بار انہیں بہتر کارکردگی کی توقع ہے۔اشون کے مطابق جب بھی وہ اس میدان پر آتے ہیں، سری لنکا کے خلاف 2015میں لئے گئے 10وکٹ انہیں یاد آتے ہیں۔اشون کے مطابق یہ میدان ان کے لئے اچھی یادیں لے کر آتا ہے۔بتا دیں کہ اشون کا یہ 50واں ٹیسٹ میچ ہوگا۔
اشون نے کہا کہ میں نے پچھلی بار 2015میں کافی اچھا کیا تھا،وہ خواب کے سچ ہونے جیسا تھا،میرے لئے وہ خاص لمحہ تھا، کیونکہ میں ٹیسٹ ٹیم میں واپسی کر رہا تھا،اس کے بعد میں نے پہلے دن چھ وکٹ لئے تھے۔اشون نے بتایا کہ سری لنکا کے کمار سنگاکارا اور جنوبی افریقہ کے بلے باز اے بی ڈی ویلیئرز ان ٹیسٹ میں پسندیدہ وکٹ ہیں۔آپ کو بتا دیں کہ ہندوستان نے آخری بار سری لنکا میں ٹیسٹ سیریز پر 2-1سے قبضہ جمایا تھا،اگر اشون نے اپنا گزشتہ دورے والی کارکردگی دہرا دی، تو ٹیم انڈیا ایک بار پھر سری لنکا کو انہیں کی سرزمین پر ٹیسٹ سیریز جیت سکتی ہے۔