برمنگھم،3؍جون(ایس او نیوز؍آئی این ایس انڈیا)پاکستان کرکٹ بورڈ (پی سی بی)چیئرمین شہریار خان نے ہندوستان اور پاکستان کے درمیان اتوار کو ہونے والے مقابلے سے پہلے اپنی ٹیم سے ملاقات کی اور کہا کہ وہ ہندوستانی ٹیم کا پورے اعتماد کے ساتھ سامنا کرے۔پی سی بی نے ایک بیان جاری کرکے کہا کہ شہریار خان نے اتوار کو ہندوستان کے خلاف ہونے والے میچ سے پہلے آج برمنگھم میں ٹیم سے ملاقات کی۔انہوں نے ٹیم سے کہا کہ وہ مکمل کھیل جذبے اور اتحاد کے ساتھ ہندوستان کا مقابلہ کریں۔بیان میں پی سی بی چیئرمین کے حوالے سے لکھا گیا ہے کہ ہندوستان اور پاکستان کے میچ میں بہترین مقابلہ ہوتا ہے،میں کھلاڑیوں سے امید کرتا ہوں کہ وہ میچ میں پوری کھیل جذبے کے ساتھ کھیلیں گے۔شہریار نے ساتھ ہی پاکستان سے پوری دنیا میں پھیلے اس کے مداحوں کی توقعات کے بارے میں ذکر کیا۔شہریار نے کہا کہ انہیں ٹیم کے ٹرافی جیتنے کی قابلیت پر اعتماد ہے۔انہوں نے کہا کہ ہمارے پاس سرفراز احمد کی قیادت میں نوجوان اور باصلاحیت ٹیم ہے،اگر کھلاڑی اپنی قابلیت کے ساتھ کھیلتے ہیں تو ٹیم ٹورنامنٹ پر قبضہ جما سکتی ہے۔