کاروار20/جون (ایس او نیوز) یہاں جوئیڈا کے قریب گوا۔ انموڈ سرحد پر واقع پولس چیک پوسٹ پر آج بدھ صبح محکمہ محصولات (ایکسائز) کے آفسران نے ایک لاری پر چھاپہ مارا اور اُس میں سے ایک لاکھ سے زائد مالیت کی گوا کی شراب برآمد کی جسے دوسرے سامانوں کےدرمیان چھپا کر غیرقانونی طور پر حیدرآباد لے جانے کی کوشش کی جارہی تھی۔
محکمہ ایکسائز کے آفسران نے بتایا کہ الیکٹرک آلات سے بھری لاری کے درمیان شراب کے بوکس رکھے گئے تھے۔ مصدقہ اطلاع پر کاروائی کرتے ہوئے محکمہ ایکسائز کے آفسر منجوناتھ کی قیادت میں دیگر اہلکاروں نے جوائیڈا کے گوا۔ کرناٹک بارڈر پر لاری کو روکا اور اس کی تلاشی لی اور قریب 1,19,600 مالیت کی شراب برآمد کی۔
لاری پرموجود الیکٹرک آلات سمیت محکمہ محصولیات نے لاری کو بھی ضبط کرلیا ہے ، جس کی جملہ مالیت پچاس لاکھ روپئے لگائی گئی ہے، جبکہ لاری ڈرائیوررام سوامی کو گرفتار کرلیا گیا ہے۔ بتایا گیا ہے کہ رام سوامی خود لاری کا مالک بھی ہے۔
منجوناتھ نے بتایا کہ گوا سے غیر قانونی شراب کو لاری میں لاد کر جوائیڈا تعلقہ کے انموڈ بارڈر سے بیلگام کے راستے حیدرآباد لے جانے کی کوشش کی جارہی تھی، جس کے دوران چھاپہ مارا گیا۔
جوئیڈا پولس تھانہ میں معاملہ درج کیا گیا ہے۔