شام: الباب شہر پر ”فرات کی ڈھال“فورسز کا مکمل کنٹرول
دمشق، 23/فروری(ایس او نیوز/آئی این ایس انڈیا)شامی اپوزیشن نے جمعرات کے روز اعلان کیا ہے ”فرات کی ڈھال“ فوجی آپریشن میں شریک ترکی کی حمایت یافتہ فورسز نے شام کے شمالی شہر الباب کا مکمل کنٹرول حاصل کر لیا ہے۔ ترکی کے وزیر دفاع کا بھی کہنا ہے کہ شام کا شہر الباب اس وقت مکمل طور پر فرات کی ڈھال میں شریک فورسز کے کنٹرول میں ہے۔شامی جیشِ حْر کے قانونی مشیر اسامہ ابو زید نے اپنی ٹوئیٹ میں کہا ہے کہ داعش تنظیم کے ساتھ جیشِ حْر کے بہادر جنگجوؤں کے گھمسان کے معرکوں کے بعد اب الباب شہر مکمل طور پر آزاد ہے۔ادھر شامی مسلح اپوزیشن میں شامل "السلطان مراد" گروپ کے کمانڈر احمد عثمان نے فرانسیسی خبر رساں ایجنسی کو بتایا کہ الباب شہر کو مکمل طور پر آزاد کرا لیا گیا ہے اور اس وقت رہائشی علاقوں کو بارودی سرنگوں سے پاک کیا جا رہا ہے۔اس سلسلے میں ترکی کی سرکاری نیوز ایجنسی اناضول نے بتایا ہے کہ تْرک فوج کی حمایت یافتہ شامی جیش حْر کی فورسز نے شمالی شام کے اس اہم شہر کو داعش تنظیم سے چھین کر ہی دم لیا۔