بنگلورو،6؍جون(ایس او نیوز) ریاست بھر میں 64نئے فائر فورس پولیس تھانے قائم کئے جائیں گے، جن میں سے 15تعلقہ جات میں نئے تھانوں کی شروعات کی جائے گی۔ یہ بات آج ریاستی لیجسلیٹیو کونسل کو وزیر داخلہ ڈاکٹر جی پرمیشور نے بتائی۔ وقفۂ سوالات میں کانگریس رکن شیوانندایس پاٹل کی طرف سے اپاجی گوڈا کے سوال کا جواب دیتے ہوئے وزیر موصوف نے کہاکہ جن مقامات کو نئے تعلقہ جات کے طور پر چنا گیا ہے وہاں پر جلد از جلد زمین حاصل کرکے فائر فورس کے تھانے قائم کردئے جائیں گے۔بسون باگے واڑی میں ایک فائر فورس تھانہ کے قیام کی منظوری دی جاچکی ہے۔ اس موقع پر وزیر داخلہ نے بتایاکہ گلبرگہ ضلع کے اعظم پور ہوبلی کے شیونی میں ایک پولیس تھانہ قائم کرنے کی مانگ پر حکومت سنجیدگی سے غور کرکے کارروائی کرے گی۔2017-18کے دوران حکومت نے اب تک کسی بھی مقام پر پولیس تھانہ کے قیام کو منظوری نہیں دی، بلکہ موجودہ پولیس تھانوں کی ترقی پر توجہ مرکوز کی گئی ہے، آنے والے دنوں میں نئے پولیس تھانوں کے قیام پر توجہ دی جائے گی۔ تریکیرے تعلقہ میں نئی سب جیل اور اسٹاف کوارٹرس کی تعمیر کے سلسلے میں انہوں نے کہاکہ یہاں کے مانکن ہلی میں پانچ ایکڑ زمین منظور کی گئی ہے جہاں 75لاکھ روپیوں کی لاگت سے سب جیل تعمیر کی جارہی ہے۔ اس کے علاوہ 17.45لاکھ روپیوں کی لاگت سے عملے کی کوارٹرس کی تعمیر کیلئے انتظامی منظوری د ی جاچکی ہے، جلد از جلد کام شروع کردیا جائے گا۔