انکولہ 5؍اگست (ایس او نیوز)انکولہ کے ایک ریٹائرڈ اسسٹنٹ فاریسٹ آفیسر نریندرا ہیتّل مکّی کے گھر کو انفورسمنٹ ڈائریکٹوریٹ بنگلور و کے افسران نے اپنے قبضے میں لیتے ہوئے مہر بند کردیا ہے۔ بتایاگیا ہے کہ مذکورہ مکان کی ملکیت نریندراکی بیوی کلاکے نام پر ہے۔

ذرائع کے مطابق  بیلے کیری میں لاپتہ ہونے والے میگنیز ذخیرے سے متعلق چھان بین کے دوران اسسٹنٹ فاریسٹ آفیسر نریندرا کی املاک میں یہ مکان ان کی معلوم ذرائع آمدنی سے زیادہ ملکیت ثابت ہونے پر انفورسمنٹ کے افسران نے یہ قدم اٹھا یا ہے۔ ضبط اور مہر بند کیے گئے مکان کی قیمت 17لاکھ روپے بتائی گئی  ہے۔پتہ چلا ہے کہ انفورسمنٹ ڈائریکٹوریٹ کی طرف سے گزشتہ چار مہینے قبل اس مکان کو خالی کرنے کی نوٹس جاری کی گئی تھی۔ اب 4اگست کو انفورسمنٹ ڈائریکٹوریٹ کے افسران نے مکان مالک نریندرا ہیتل مکی کی بیوی کلا ہیتل مکی کی موجودگی میں ہی ضلع انتظامیہ کے افسران، تحصیلدار اور پولیس کے سامنے پنچ نامہ کرتے ہوئے مذکورہ مکان کو ضبط کرلیا۔