شہنشاہ جذبات دلیپ کمار کی پراپرٹی پر بلڈر قبضہ کرنا چاہتا ہے، اہلیہ سائرہ بانو نے مودی سے مدد کی اپیل کی
ممبئی :16/دسمبر (ایس او نیوز/آئی این ایس انڈیا) زمین مافیا سے پریشان مشہور اداکارشہنشاہ جذبات دلیپ کمار کی بیوی سائرہ با نو نے اب پی ایم مودی سے مدد مانگی ہے۔ اتوار کو انہوں نے دلیپ کمار کے ٹوئٹر کے اکاؤنٹ سے ایک ٹویٹ کیا اور لکھا ’’ سر، لینڈ مافیا سمیر بھوجوانی جیل سے رہا ہو چکا ہے۔ مہاراشٹر کے وزیر اعلی دیویندر فڑنویس کی یقین دہانی کے باوجود کوئی کارروائی نہیں ہوئی۔ پدم وبھوشن سے نوازے گئے شخص کو طاقت اور سرمایہ کے بدولت مسلسل دھمکی دی جارہی ہے، آپ سے ممبئی میں ملاقات کی اپیل ہے ۔واضح ہو کہ 96 سالہ شہنشاہِ جذبات دلیپ کمار کا بنگلہ باندرہ کے ’’سنبھات ہل‘‘ علاقہ میں واقع ہے۔ اسی سال سائرہ بانو نے پولیس سے رابطہ کیا تھا اور سمیر بھوجوانی کے خلاف شکایت درج کرائی تھی۔جنوری میں ممبئی پولیس اقتصادی کرائم برانچ نے سدا بہار شہنشاہ جذبات دلیپ کمار کے بنگلے کو قبضہ کرنے کی کوشش پر بلڈر کے خلاف مقدمہ درج کیا تھا۔ پولیس افسران کو شک تھا کہ بھوجوانی نے جائیداد کے فرضی کاغذات تیار کرائے تھے۔ اس کے بعد مقدمہ درج کیا گیا۔ متعلقہ محکمہ کی ٹیم نے بھوجوانی کے باندرہ میں واقع رہائش گاہ پر چھاپہ مارا جہاں سے چاقو اور چھرے سمیت ہتھیار برآمدہوئے تھے ۔ بھوجوانی کو اقتصادی کرائم برانچ نے اس سال اپریل میں گرفتار کیا تھا۔ ابھی دلیپ کمار کے بنگلے کے دو پلاٹ پر مالکانہ حق کا جھوٹا دعوی کرنے والے سمیر بھوجوانی کی رہائی کے بعد سائرہ با نو نے پی ایم سے اپیل کی ہے۔