بنگلورو،22؍نومبر(ایس او نیوز) برہت بنگلور مہانگر پالیکے کے ڈپٹی میئر کا انتخاب 5 دسمبر کو کیا جائے گا۔ڈپٹی میئر کے ساتھ بی بی ایم پی کی اسٹانڈنگ کمیٹیوں کے ممبران اور چیرمینوں کا انتخاب بھی اسی روز عمل میں آئے گا۔ فی الوقت بی بی ایم پی اسٹانڈنگ کمیٹیوں کے چیرمینوں کی میعاد 9؍ نومبر کو پوری ہوچکی ہے۔ ان میں سے 5 دسمبر کو کتنے کارپوریٹروں کو دوبارہ چیرمین شپ یا کمیٹیوں میں رکنیت ملتی ہے یہ اسی وقت پتہ چلے گا۔ ڈپٹی میئر کے عہدے پر منتخب رمیلا اوما شنکر کی ناگہانی موت کے سبب یہ عہدہ بھی پچھلے دو ماہ سے خالی ہے۔ اس عہدے کو پر کرنے کے لئے اس سے پہلے بھی کافی کوششیں کی گئی تھیں، لیکن اسٹانڈنگ کمیٹیوں کے انتخاب کے ساتھ اب اس عمل کو بھی مکمل کیا جارہاہے۔ اس دوران بی جے پی نے انتخاب کے لئے طے کئے گئے وقت پر اعتراض کیا اور کہاکہ ڈویژنل کمشنر شیویوگی کلساد نے حکمران اتحاد کو فائدہ پہنچانے کے مقصد سے تاریخ کے تعین میں راز داری برقرار نہیں رکھی ہے۔ اس دوران میئر کے انتخاب کے مرحلے میں جس طرح بی جے پی کو منہ کی کھانی پڑی تھی شاید اس سے بی جے پی کو کوئی سبق نہیں ملا ہے۔ یہی وجہ ہے کہ ایک بار پھر ڈپٹی میئر اور کمیٹیوں کے چیرمینوں کے انتخاب کے مرحلے میں بی جے پی دوسری پارٹیوں کے کارپوریٹروں کو رجھانے کی کوشش میں نظر آرہی ہے۔ آزاد کارپوریٹروں کی نظریں بھی مختلف کمیٹیوں کی چیرمینوں پر ٹکی ہوئی ہے تو دوسری طرف کانگریس کے چند سینئر کارپوریٹروں نے بھی بی بی ایم پی کی چیرمین شپ کے لئے اپنے اپنے سیاسی آقاؤں کے ذریعے دباؤ بنانے میں لگے ہوئے ہیں۔ آج اس سلسلے میں کانگریس کے بعض کارپوریٹروں نے اپنے اپنے سیاسی آقاؤں سے رابطہ کرکے اس کوشش میں ہیں کہ انہیں کسی نہ کسی کمیٹی میں چیرمین شپ کا موقع فراہم کیا جائے۔ دوسری طرف جے ڈی ایس میں بھی دعویداروں کی کوئی کمی نہیں ہے۔