میسور،19/مارچ(ایس او نیوز) بی جے پی کے ریاستی صدر بی ایس یڈ یورپا نے آج یہاں وزیراعلیٰ سدارامیا پر یہ الزام عائد کیاہے کہ ننجنگڈھ اور گنڈل پیٹ کے ضمنی انتخابات میں پارٹی کے امیدوار کو ہرحالت میں کامیاب کرنے کے لئے وہ ووٹروں میں رقم تقسیم کررہے ہیں۔ اس بات کا پتہ خود بی جے پی کارکنوں نے یہاں لگایاہے۔ ریاست کے عوام خشک سالی سے پریشان ہیں ان کی فریاد سننے یاانہیں راحت پہنچانے کے بدلے وزیراعلیٰ ان دو اسمبلی حلقوں میں پارٹی امیدواروں کو کامیابی دلوانے یہیں اپنا وقت صرف کررہے ہیں۔ عوام اس کا مشاہدہ کررہے ہیں اور انتخابات میں انہیں سبق سکھانے والے ہیں۔ کسی بھی حالت میں اپنے اقتدار کے غلط استعمال سے انہیں کوئی فائدہ پہنچنے والا نہیں ہے۔ان دو حلقوں کے ضمنی انتخابات میں کانگریس کی مہم چلانے وزیراعلیٰ سدارامیا اور ان کی کابینہ کے تمام وزراء یہیں کیمپ کئے ہوئے ہیں اور حکومت کا نظام ٹھپ ہوگیاہے۔