ضمنی انتخابات کے لئے انتخابی مہم زوروں پر
بنگلورو،23؍اکتوبر(ایس او نیوز) پانچ حلقوں کے ضمنی انتخابات کے لئے انتخابی مہم دن بہ دن شدت اختیار کرتی جارہی ہے۔ شیموگہ منڈیا اور بلاری لوک سبھا حلقوں اور رام نگرم اور جمکھنڈی اسمبلی حلقوں کے لئے کانگریس جے ڈی ایس اور بی جے پی اپنے اپنے امیدواروں کی کامیابی کے لئے ایڑی چوٹی کا زور لگارہے ہیں۔
پانچ حلقوں میں کانگریس اور جے ڈی ایس اتحاد ہوا ہے تو بی جے پی ان حلقوں میں اپنی سیاست پہچان بچانے کے لئے میدان میں اتری ہے۔ سابق وزیراعظم ایچ ڈی دیوے گوڈا ، وزیراعلیٰ ایچ ڈی کمارسوامی ، سابق وزیراعلیٰ سدرامیا، اور دیگر ریاست بھر میں پھیل کر انتخابی مہم چلانے میں مصروف ہیں۔ شیموگہ پارلیمانی حلقے سے جے ڈی ایس امیدوار مدھو بنگارپا کو کامیاب بنانے کے لئے آج سابق وزیراعظم دیوے گوڈا خود میدان میں اتر پڑے ، انہوں نے یہاں ساگر ، تیرتھ ہلی ، شیموگہ ٹاؤن اور دیگر مقاموں پر انتخابی مہم چلائی۔
ضلع کے جے ڈی ایس لیڈروں کے ساتھ سابق وزیراور سینئر کانگریس لیڈر کاگوڈ تمپا ، کمنے رتنا کر وغیرہ بھی آج دیوے گوڈا کے ساتھ رہے۔ سابق وزیر اعلیٰ اور ریاستی بی جے پی صدر یڈیورپا نے آج منڈیا حلقے میں پارٹی امیدوار کے حق میں مہم چلائی، جبکہ بلاری میں کانگریس امیدوار وی ایس اگرپا کے حق میں سابق وزیراعلیٰ سدرامیا اور دیگر پارٹی لیڈروں نے زور دار انتخابی مہم چلانے کا سلسلہ جاری رکھا۔
بی جے پی کی طرف سے یہاں بی سری راملو کی طرف سے انتخابی مہم جاری ہے۔ جمکھنڈی اسمبلی حلقے میں کانگریس امیدوار آنند نیامے گوڈا کے حق میں نائب وزیراعلیٰ ڈاکٹر پرمیشور نے انتخابی مہم چلائی۔ رام نگرم میں جے ڈی ایس امیدوار انیتا کمار سوامی کے حق میں مقامی جے ڈی ایس اور کانگریس لیڈروں کی طرف سے انتخابی مہم کا سلسلہ جاری رہا۔