چھتیس گڑھ میں تھم گئی انتخابات مہم 12 نومبر کو ہوگی پہلے مرحلے کی ووٹنگ
نئی دہلی:10/نومبر(ایس او نیوز/آئی این ایس انڈیا)چھتیس گڑھ اسمبلی انتخابات کے پہلے مرحلے کی پولنگ 12 نومبر کو اور اس کے لئے انتخابی مہم آج تھم گئی ہے ۔ انتخابی مہم کے آخری دن بی جے پی صدر امت شاہ اور کانگریس صدر راہل گاندھی نے ریاست میں کئی ریلیاں کیں۔ چھتیس گڑھ کی نکسل متاثرہ 18 اسمبلی سیٹوں پر 12 نومبر کو ووٹ ڈالے جائیں گے۔ اس کے بعد 20 نومبر کو دوسرے مرحلے کے لئے ووٹ ڈالے جائیں گے۔ ووٹوں کی گنتی 11 د سمبر کو ہوگی۔آج بی جے پی نے چھتیس گڑھ کے لئے منشور جاری کیا جس میں 12 ویں تک تمام طلبا و طالبات کو مفت کتابیں اور یونیفارم دینے، صحافی بہبود بورڈ قائم کرنے، خواتین کو کاروبار شروع کرنے کے لئے 2 لاکھ روپے تک سود سے پاک قرض دیئے جانے کا اعلان کیا۔امت شاہ نے آج دوپہر بعد راجم میں انتخابی ریلی سے خطاب کیا اور اس کے بعد دوپہر تین بجے راجندگاؤں میں روڈ شو کیا۔یوپی کے وزیر اعلی یوگی آدتیہ ناتھ نے بھی چھتیس گڑھ میں کئی ریلیوں سے خطاب کیا۔ کانگریس صدر راہل گاندھی نے بھی ریاست میں ریلیاں کیں۔ وزیر اعظم نریندر مودی نے چھتیس گڑھ کے پہلے مرحلے کے انتخابات کے لئے صرف ایک ریلی کی ہے۔ کل انہوں نے جگدل پور میں انتخابی ریلی سے خطاب کیا تھا۔ انہوں نے کانگریس پرنکسلیوں کی مفروضہ حمایت دینے کا الزام لگایا تھا۔