نئی دہلی،30؍جنوری (ایس او نیوز؍آئی این ایس انڈیا)شمال مغربی دہلی کے نیتا جی سبھاش پیلیس علاقے میں آٹھ ماہ کی بچی کی اس کے چچا زاد بھائی نے مبینہ طور پر عصمت دری کی۔ پولیس کے مطابق گزشتہ دیر رات ملزم کو گرفتار کرلیا گیا ہے۔ اس کی شناخت سورج(28) کے طور پر کی گئی ہے۔ وہ بچی کے تایا کا بیٹا ہے۔پولیس کے سینئر افسر نے بتایا کہ سورج نے اعتراف کیا ہے کہ کل اس نے شراب کے نشے میں بچی کی عصمت دری کی ہے ۔ بچی کے اہل کنبہ نے بتایا کہ کل دوپہر میں بچی گھر میں اکیلی تھی تبھی سورج نے اس کی آبروریزی کی ہے۔ بچی کو لیڈی ہارڈنگ اسپتال میں داخل کرا دیا گیا ہے جہاں اس کی حالت سنگین ہے۔وویمن کمیشن کی سربراہ سواتی مالیوال نے کہاکہ کیا کیا جائے؟ دہلی آج کیسے سو سکتا ہے جب آٹھ ماہ کی بچی کا دارالحکومت میں ظالمانہ ریپ کیا گیا؟ کیا ہم اتنے بے حس ہو چکے ہیں یا ہم نے اسے اپنی تقدیر کے طور پر قبول کر لیا ہے؟انہوں نے براہِ راست وزیرِ اعظم نریندر مودی سے اپیل کی کہ وہ ملک میں لڑکیوں کو بچانے کے لیے سخت قوانین اور مزید پولیس کا انتظام کریں۔2012 میں ایک طالبہ کے ساتھ گینگ ریپ کے بعد جنسی تشدد کے حوالے سے انسدادِ ریپ کے قوانین متعارف کروائے جن میں سزائے موت بھی شامل ہے۔تاہم ملک میں اب بھی بچوں اور عورتوں کے خلاف سنگین جنسی حملے جاری ہیں۔