حیدرآباد میں نماز عید کے روح پرور اجتماعات ، عیدگاہ میرعالم میں تین لاکھ سے زائد مسلمانوں نے ادا کی نماز
تلنگانہ،17؍جون(ایس او نیوز) حیدرآباد سمیت دونوں تلگوریاستوں تلنگانہ اور آندھراپردیش میں عید الفطر روایتی جوش وخروش کے ساتھ منائی گئی۔ عوام نے ایک دوسرے کو عید کی مبارکباد پیش کی۔ تلنگانہ کے دارالحکومت شہر حیدرآباد میں بھی روح پرور اجتماعات دیکھے گئے ۔ شہر حیدرآباد کی تاریخی مکہ مسجد سمیت تمام مساجد ، عید گاہوں میں بھی نماز عید ادا کی گئی ۔تاہم عید کا سب سے بڑا اجتماع عید گاہ میرعالم میں دیکھا گیا، جہاں تقریباتین لاکھ سے زائد مسلمانوں نے نماز عید اداکی۔
نماز سے پہلے مولانا سیف اللہ شیخ الادب جامعہ نظامیہ او رامیر امارت ملت اسلامیہ مولانا حسام الدین عاقل جعفر پاشاہ نے فضائل عید الفطر بیان کئے۔ عید گاہ میرعالم میں حافظ و قاری محمد رضوان قریشی خطیب مکہ مسجد نماز اور خطبہ کے فرائض انجام دیئے۔ تلنگانہ اسٹیٹ وقف بورڈ کے چیئرمین محمد سلیم اور مجلس اتحاد المسلمین کے صدر اسدالدین اویسی نے بھی عیدگاہ میرعالم میں نماز عید ادا کی ۔ نماز سے قبل مولانا محمد سیف اللہ اور مولانا حسام الدین ثانی جعفر پاشاہ نے خطاب کرتے ہوئے کہا ہے کہ قرآن مجید رمضان المبارک کا تحفہ ہے ، جسے اس ماہ مقدس میں پیغمبر اسلام پر نازل فرمایا گیا ۔لیکن آج ہم نے قرآن مجید کو چھوڑ دیا ہے ۔ اس موقع پر مسلمانوں نے ایک دوسرے کو گلے لگا کر عید کی مبارکباد پیش کی ۔
تلنگانہ اسٹیٹ وقف بورڈ کی جانب سے عیدگاہ میرعالم پر مناسب انتظامات کیے گئے تھے۔ وقف بورڈ کے چیئرمین محمد سلیم اور حیدرآباد کے پولیس کمشنر انجنی کمار نے عیدگاہ پہنچنے والے مصلیوں کو گلاب دے کر عید کی مبارکباد پیش کی ۔ اس موقع پر میڈیا سے بات چیت کرتے ہوئے انجنی کمار نے کہا کہ حیدرآباد گنگا جمنی تہذیب کا گہوارہ ہے ۔
عید کے موقع پر ہندو اور مسلم اتحاد کی مثال دیکھی جا تی ہے۔ حیدرآباد کی تاریخی مکہ مسجد میں بھی نماز عید اداکی گئی ۔ مولانا عبدالطیف نے نماز عید کی امامت کی ۔ فرزندان توحید کی ایک بڑی تعداد نے مکہ مسجد میں نماز اداکی گئی ۔ اس موقع لوگوں نے ایک دوسرے کو عید سعید کی مبارکباد پیش کی ۔ اس موقع پر بچوں میں کافی جوش خروش دیکھا گیا۔
اس کے علاوہ حیدرآباد کے حج ہاوس ، عیدگاہ بلالی مانصاب ٹینک، نامپلی کی ایک مینار مسجد کے علاوہ سکندرآباد ملیٹری گراؤنڈ پر نماز عید اداکی گئی ۔ جہا ں فرزندان توحید کی بڑی تعداد نے ان اجتماعات میں شرکت کی ۔حیدرآباد پولیس نے شہر کی اہم عید گاہوں اور مساجد کے سیکورٹی کے مؤ ثر انتظامات کیے تھے۔
