بھٹکل مسلم جماعت قطر کا خوبصورت عید ملن پروگرام
قطر،30؍جون(راست /ایس او نیوز) امسال بھٹکل مسلم جماعت قطر کی طرف سے عید ملن کا پروگرام عیدالفطر کے دوسرے دن ، تاج رویال ہوٹل میں شاندار طریقے پر رکھا گیا۔ جس میں بھٹکل کی مشہور شخصیت جناب عنایت اللہ شاہ بندری مہمان خصوصی کی حیثیت سے شریک تھے۔ پروگرام جناب مولانا عبدالعظیم رکن الدین ندوی کی صدارت میں تھا۔
پروگرام کی ابتداء احمد عویمر ابن مولانا فضیل احمدآرمار کی تلاوت سے ہوئی، نورِ عرفات ابن محمد عرفان محتشم نے نعت پیش کی۔ بھٹکل مسلم جماعت قطر کے جنرل سکریٹری جناب عبدالغنی علی اکبرا نے والہانہ انداز پر حاضرین کا استقبال کیا۔
پروگرام میں مختلف پروگرامس مثلاً کوئز مقابلہ ، انٹرایکٹوکوئز اور ایک منٹ گیمس بے حد دلچسپ رہے۔ مولوی محمد اظہر آرمار ندوی نے اس موقع پر عید کا پیغام پیش کرتے ہوئے کہا کہ اسلام کی دونوں عیدیں اللہ کے ایک بڑے حکم کے ادا کرنے کے بدلہ میں منائی جاتی ہیں جس نے ماہ رمضان المبارک کو غنیمت سمجھا اور محنت کی تو اس کی محنت رائیگاں نہیں جائے گی ۔ رمضان کا مہینہ تربیت اور تقویٰ کی ٹریننگ کے لئے ہے۔ یہ تو ایک موسم ہے اصل چیز استقامت ہے روزہ کی حالت میں ہمارے سامنے حلال چیزیں آئی تھی تو بھی ہم اس سے بچتے تھے ۔ اللہ نے ہمیں یہ مہینہ باقی زندگی حرام سے بچنے کی مشق کیلئے عطا فرمایا ۔ نیکی کے بعد نیکی کرنے کی توفیق انسان کی اس نیکی کی قبولیت کی علامت ہے۔
مہمان خصوصی عنایت اللہ شاہ بندری نے اپنے خطاب میں اپنے پروگرام میں شریک ہونے کا مقصد عید ملن کے پروگرام میں شریک ہونے کے ساتھ تنظیم کیلئے زکوٰۃ کی وصولی ہے۔ جسمیں انہوں نے تنظیم کی مختلف کارکردگی کو بیان کیا۔ اور کن کن مصائب میں تنظیم زکاۃ خرچ کرتی ہے۔ اس کو تفصیل سے بتایا اور ساتھ ہی شہر بھٹکل کے مختلف حالات پر روشنی ڈالی۔
پروگرام میں لکی ڈرا کی بڑی حیثیت رہی جسمیں اٹھارہ 18انعامات تقسیم ہوئے ۔ اول انعام اسپلینڈر جناب مولانا فضیل صاحب آرمار کے حق میں رہا۔ تو دوم انعام عمرہ پیکچ جناب مولانا یٰحی برماور کے حصہ میں آیا۔ پروگرام کے شروع میں پُر تکلف و پر لطف مختلف قسم کے کھانے کا بھی نظم کیا گیا تھا۔
آخر میں صدارتی کلمات اور دعا کے ساتھ پروگرام اختتام پذیر ہوا۔
