ممبئی میں عیدالفطر مذہبی جوش وخروش سے منائی گئی ، عروس البلاد میں جشن کا ماحول
ممبئی،17؍جون(ایس او نیوز) ممبئی میں چاند کی عام رویت ہونے کے بعد سے عروس البلاد میں جشن کا سماں بندھ گیا اورسنیچر کی صبح شہر بھر کی مساجد میں فرزندان توحید نے نماز دوگانہ اداکی اور اپنے رب کے حضور سجدہ شکر اداکیا کہ ماہ صیام کے دوران اُس نے روزہ رکھنے اور مختلف عبادات کی توفیق عطا کی ۔ جمعہ کو نماز مغرب سے قبل ہی لوگوں نے چاند کی جھلک دیکھ لی اور فرط مسرت سے فرزندان توحید کی آنکھیں نم ہوگئیں۔ اس کے ساتھ ہی شہر اور آس پاس کے علاقوں میں آتش بازی داغی گئی۔
شہر میں نماز عید الفطر کا سب سے بڑا اجتماع جنوبی ممبئی میں انجمن اسلام کمپلکس ،جامع مسجد ،مینارہ مسجد ،وغیرہ میں دیکھا گیا ۔مسلم اکثریتی علاقوں بھنڈی بازار،محمد علی روڈ،نل بازار ،جے جے اسپتال ،ڈونگری ،مدنپورہ ،ناگپاڑہ ،بائیکلہ ،ممبئی سینٹرل اور اگری پارہ کے ساتھ ساتھ ماہم ،باندرہ ،کرلا ،شیخ مصری ،ممبرا ،میرا روڈ،بھیونڈی وغیرہ میں مساجد مصلیان سے بھری ہوئی تھیں،کیونکہ آج صبح سے شہر میں ہلکی بارش رک رک کر ہورہی تھی ،اس لیے مساجد کے منتظمین نے دودوجماعتوں کا اہتمام کیا ۔ جبکہ شہر میں کہیں بھی کھلے میدان میں نمازدوگانہ ادانہیں کی گئی کیونکہ بارش سے میدانوں میں پانی جمع تھا ۔
نماز عید الفطر کے دوران شہر بھر میں پولیس کا زبردست انتظام رہا اور کسی بھی جگہ سے کوئی ناخوشگوار واقعہ کی کوئی اطلاع موصول نہیں ہوئی ہے۔مساجد اور عید کی خریداری کے بازاروں میں گزشتہ روز سے پولیس اہلکارا تعینات کیے گئے تھے۔ نماز عید کے خطبات میں مسلمانوں کو ماہ رمضان المبارک کے روزوں اور عبادات کے ساتھ ساتھ اللہ تعالیٰ کے ذریعہ عید کے تحفہ کی اہمیت کو ائمہ مساجد نے بیان کیا۔ اس موقع پر مسلمانوں کی بھلائی اور امن عالم خصوصی طورپر عالم اسلام میں امن کے لیے دعائیں کی گئیں۔
