دھارواڑ: قیمتیں بڑھنے سے آنگن واڈی بچوں کو انڈوں کی فراہمی بند۔ کارکنوں کی طرف سے احتجاج اور میمورنڈم کی تیاری
ہبلی 30؍نومبر (ایس او نیوز) حکومت کی طرف سے جاری 'ماتر پورنا'اسکیم کے تحت جہاں حاملہ خواتین اور زچہ کو مقوی غذائیں اور دوائیں فراہم کی جاتی ہیں وہیں پر چھوٹے بچوں کو بھی اسکولوں میں دوپہر کا کھانا ، دودھ ، انڈے وغیرہ فراہم کیے جاتے ہیں۔
لیکن اب انڈوں کی قیمت پانچ روپے فی انڈہ سے بڑھ کر 7روپے فی انڈہ تک ہوگئی ہے تو پھر سرکار کی طرف سے صرف پانچ روپے ملنے کی وجہ سے آنگن واڑی اسکولوں میں انڈوں کی فراہمی بند ہوگئی ہے۔ اس سلسلے میں دھارواڑ ضلع کے آنگن واڑی کارکنوں نے اس کے خلاف آواز اٹھائی ہے کیونکہ ان کا کہنا ہے کہ افسران اس طرف توجہ نہیں دے رہے ہیں اورالٹے آنگن واڑی ٹیچروں کو زبانی طور پر ہدایت دے رہے ہیں کہ انڈے کی اضافی قیمت وہ خود اپنی تنخواہ میں سے اداکریں اور بچوں کو انڈے فراہم کریں۔ان آنگن واڑی ٹیچروں کا سوال یہ ہے کہ پہلے ہی انہیں اتنی کم تنخواہیں ملتی ہیں ، پھر اس میں سے بچوں کو انڈے فراہم کرنے کے لئے پیسے خرچ کرنا کس طرح ممکن ہے۔
دوسر ی طرف محکمہ بہبودئ خواتین و اطفال کے ڈپٹی ڈائریکٹر بابو کلادگی نے بتایاکہ انڈوں کی قیمتیں بہت زیادہ بڑھ جانے سے بچوں کے لئے انڈے فراہم کرنے میں تھوڑی سی رکاوٹ پیدا ہوگئی ہے، میں نے اپنے محکمہ کے ڈائریکٹر کو اس ضمن میں تحریری رپورٹ بھیجی ہے۔حکومت کی طرف سے بہت جلد اس تعلق سے اقدام کیا جائے گا۔
