تعلیمی اداروں کے پاس تمباکو کی فروخت ممنوع،کارروائی کرتے ہوئے 21لاکھ روپیوں کا جرمانہ وصول
بنگلورو،21؍جون(ایس اونیوز)شہر کے اسکول ، کالجوں اور دیگر عوامی مقامات پر تمباکو سے بنی اشیاء بشمول سگریٹ وغیرہ فروخت کرنے پر کارروائی کرتے ہوئے شہر کی سٹی کرائم برانچ پولیس نے 12594 مقدمات درج کئے ہیں اور مئی کے اختتام تک 21لاکھ سے زائد روپیوں کی رقم بطور جرمانہ وصول کی گئی ہے۔ گزشتہ سال ریاستی حکومت نے شہر کے مختلف اہم علاقوں اور عوامی مقامات پر تمبا کو اشیاء کی فروخت پر پابندی لگادی تھی۔ اس پر کارروائی کرتے ہوئے 122226معاملات درج کئے گئے اور 22لاکھ سے زیادہ کی رقم بطور جرمانہ وصول کی گئی ۔یہ بات اڈیشنل کمشنر آف پولیس ایس روی نے بتائی۔انہوں نے کہاکہ شہر میں نیشنل آرٹس کالج کے قریب سگریٹ اور دیگر تمبا کو اشیاء کی فروخت کرنے کی مرتکب 145 دکانوں پر کارروائی کی گئی اور 25افرادکو گرفتار کرلیا گیاہے۔ ان ملزمین سے 3.28لاکھ روپیوں کا تمباکو ضبط کیاگیا۔