تعلیم کو عام کرنے کے منصوبے میں کرناٹکا حکومت کی ناقص کارکردگی۔ایچ آر ڈی وزارت کی رپورٹ
نئی دہلی 11؍اکتوبر (ایس او نیوز)مرکزی حکومت کی تعلیم کو عام کرنے کی 'سرو شکھشنا ابھیان'اسکیم کے تحت ریاستوں کی کارکردگی کے تعلق سے جو رپورٹ وزارت فروغ وسائل انسانی (ایچ آر ڈی) نے پیش کی ہے اس کے مطابق حکومت کرناٹکا کی کارکردگی انتہائی ناقص ہے۔
ایچ آر ڈی کی رپورٹ کے مطابق مذکورہ اسکیم کے تحت بچوں کا معیار تعلیم بڑھانے اور اسکول ڈراپ آوٹس کو دوبارہ اسکول میں لاتے ہوئے ان کی تعلیم کا سلسلہ جاری رکھنے میں کرناٹکا حکومت پوری طرح ناکام ہے۔ دراصل سرو شکھشنا ابھیان کے تحت طے کیے گئے اہداف میں ریاستی حکومتوں کی سالانہ کارکردگی کو ایچ آر ڈی وزارت چھ مہینے میں ایک بار جانچتی ہے۔اس جانچ کے لئے مقرر کردہ 100مارکس میں ریاست کرناٹکا کو 41سے50مارکس کے درمیان والا زمرہ ملا ہے جس میں ریاست بہار شامل ہے۔ جبکہ سب سے بہترین کارکردگی والے 91سے 100مارکس کے زمرے میں کیرالہ، پڈوچیری، آندھرا پردیش، مہاراشٹرا، گجرات اور اتر اکھنڈ کا نام آیا ہے