رابرٹ واڈرا کے ساتھیوں پر ای ڈی کا چھاپہ، وکیل کا حکومت پر نشانہ
نئی دہلی :7/دسمبر (ایس او نیوز/آئی این ایس انڈیا) ای ڈی (ED) نے دہلی اور بنگلور میں بزنس مین رابرٹ واڈرا کے ساتھیوں سے جڑے کئی ٹھکانوں پر چھاپہ ماری کی ہے۔ اس کے بعد واڈرا کے وکیل میڈیا کے سامنے آئے اور انہوں نے اس ایکشن کو لے کر حکومت پر نشانہ لگایا۔ واضح ہو کہ واڈرا کے ساتھیوں پر پیچ ایسے وقت میں کسا جا رہا ہے جب پانچ ریاستوں کے اسمبلی انتخابات کے لئے ووٹنگ ختم ہو چکی ہے اور اب ایگزٹ پولز سامنے آرہے ہیں ۔ دہلی میں واڈرا کے وکیل نے الزام لگایا کہ انہوں نے (ED کی ٹیم) اسکائی لائٹ ہسپیلیٹی کے ہمارے لوگوں کو اندر بند کر دیا ہے۔ وہ کسی کو بھی اندر جانے نہیں دے رہے ہیں۔ کیا یہ نا زی ازم ہے ؟ کیا یہ جیل ہے؟ وکیل نے مزید کہا کہ ساڑھے چار سال ہو گئے ہیں اور انہیں کچھ نہیں ملا ہے.۔اب وہ ہمیں باہر رکھ کر ثبوت قائم کرنے کی کوشش کر رہے ہیں۔